जनकपुर-भिठ्ठामोड सडक : दुई वर्षमा ३५ प्रतिशत काम

जनकपुरधाम । जनकपुर-भिठ्ठामोड सडकले भारतीय सीमासँग जोड्छ, सीता नगरीलाई । यही सडक दशकौंदेखि जीर्ण रहँदा भारतीय तीर्थ यात्री आउजाउमा कष्ट त छँदैछ, दैनिक उपभोग्य सामग्री आयातका लागि पनि करिब एक सय ५८ किलोमिटर टाढाको वीरगञ्ज पुग्नुपर्छ । 

जबकि, उक्त सडक हुँदै भारतीय सीमा जम्मा २२ किमि मात्र टाढा पर्छ । वर्षायाममा हिलाम्य र हिउँदमा धुलाम्य हुने गर्छ । सामान्य वर्षा हुँदा पनि महोत्तरी सदरमुकाम जलेश्वरसम्म पुग्न हम्मे पर्छ । 

जीर्ण सडककै कारण दुर्घटना सामान्य विषयजस्तो बनेको छ । १ जेठमा पनि भिठ्ठामोडबाट जनकपुर आउँदै गरेको बस दुर्घटना हुँदा २० यात्री घाइते भएका थिए । 

आजित बनेका स्थानीय बासिन्दाले धर्नालगायत आन्दोलन थालेपछि २५ भदौ ०७३ मा तत्कालीन भौतिक पूर्वाधार तथा यातायात मन्त्री रमेश लेखकले उक्त सडक निर्माणको शिलान्यास पनि नगरेका होइनन् । तर, सडक जस्ताको तस्तै छ । 

परियोजनाको लागत ९३ करोड ४३ लाख रुपैयाँ छ । र, हुलाकी राजमार्ग निर्देशनालय योजना कार्यालय जनकपुरको निगरानीमा काम अगाडि बढेको छ । 

जनकपुरदेखि महोत्तरीको पर्सासम्म प्रतिभा वाई जेभीले ४३ करोड ५६ लाखमा ठेक्का पाएको छ । त्यहाँबाट भिठ्ठामोडसम्म आतिश पप्पु रोशन जेभीले ४९ करोड ८९ लाखको ठेक्का लिएको छ । 

२३ भदौ ०७३ मै दुवै कम्पनीसँग निर्माण सम्झौता भएको थियो । २१ महिना बितिसक्दा आधा पनि निर्माण सकिएको छैन । जबकि, भदौ ०७६ सम्ममा काम सक्नुपर्ने सम्झौता छ । 

बजेट अभावका कारण ढिलाइ भएको डिभिजनल इन्जिनियर सन्तोष कर्णको दाबी छ । उनका अनुसार ६ महिनायता कामको गति सुस्त भएको हो । ‘तीन महिनादेखि ठेकेदारलाई दिने रकम सकिएको छ, अर्थ मन्त्रालयले निकासा गरेको छैन,’ कर्ण भन्छन् । 

हालसम्म चालु आर्थिक वर्षमा ६ करोडसहित १३ करोड रुपैयाँ निकासा भइसकेको छ ।

काम ३५ प्रतिशत मात्र

सम्झौता अवधि सकिन करिब वर्षदिन बाँकी रहँदा निर्माण ३५ प्रतिशत मात्र सम्पन्न भएको छ । रकम अभाव र वर्षाका कारण निर्धारित कार्यसूचीभन्दा करिब चार महिना ढिलो भएको साइट इन्जिनियर मनोज मण्डलको भनाइ छ । 

जिल्ला समन्वय समितिले ढुंगा, गिटी उत्खनन्मा बेला–बेलामा रोक लगाएकाले पनि निर्माणमा ढिलाइ भएको उनको दाबी छ । 

‘सडकको धुलोका कारण आसपासका बासिन्दा खोकी र दमको समस्या देखिन थालेको छ । यसको जिम्मेवारी कसले लिने ?’ स्थानीय सरोज पाण्डेय भन्छन् । 

काममा ढिलाइ गर्ने ठेकेदारलाई कारवाही गर्नुपर्ने स्थानीय निरुपमा रायको माग छ ।