पूर्वका विमानस्थलसँगै जोडिएन प्रदेश राजधानी

इटहरी- प्रदेश–१ को राजधानी विराटनगरस्थित विमानस्थलबाट अन्तर्राष्ट्रिय उडान र ‘माउन्टेन फ्लाइट’को प्रयास थालिएको छ । तर, प्रदेशकै विमानस्थलहरूसँग जोडिएको छैन यो । 

यस प्रदेशमा विराटनगरसहित १२ वटा विमानस्थल सञ्चालनमा छन् । सोलुखुम्बूमा चार, खोटाङमा तीन तथा ताप्लेजुङ, संखुवासभा, भोजपुर र ओखलढुंगामा १÷१ विमानस्थल सञ्चालनमा छन् । इलाममा फाल्गुनन्द विमानस्थल निर्माणाधीन छ । धरानमा पनि निर्माण हुने चर्चा चलेको लामो समय बितिसकेको छ ।

नेपाल वायु सेवा निगमका जहाजले खोटाङका थामखर्क, लामिडाँडा र खानीडाँडा, संखुवासभाको तुम्लिङटार र भोजपुर विमानस्थलमा विराटनगरबाट कहिलेकाहीं उडान गर्दै आएका छन् । 

विराटनगरमा मौसम खराब हुँदा मात्र यहाँ आउँदै गरेका जहाजहरू झापाको भद्रपुर विमानस्थल पुग्ने गर्छन् । 

विमानस्थल प्रमुख सुरेशमानसिंहका अनुसार विगतमा भारतीय राज्य विहारको राजधानी पटनासम्म विराटनगरबाट उडान हुन्थे । तर, त्यो अब इतिहासमा सीमित छ । 

एक सय १५ बिघाको यस विमानस्थलको धावनमार्ग १५ सय मिटरको छ । नेपालगञ्ज, सुर्खेत र पोखरा विमानस्थलहरूबाट आफ्नो क्षेत्रका पहाडी गन्तव्यमा उडान हुन्छन् । विराटनगरले भने विगतको आफ्नै इतिहासलाई ब्युँताउन सकेको छैन । 

सीधा उडान नभएकाले पूर्वका पहाडी भेगबाट प्रदेशको राजधानीसम्म आउजाउ गर्नुपर्दा सडकमार्ग मात्र विकल्प बनेको छ । 

खासगरी, सगरमाथाका पहाडी जिल्लाहरूबाट विराटनगर पुग्न मेची र कोशीको तुलनामा अपायक पर्छ । सोलुखुम्बू र ओखलढुंगाका बासिन्दाले त काठमाडौं पुगेर विराटनगरको यात्रा तय गर्नुपर्छ । 

प्रदेशका सबै विमानस्थलमा विराटनगरबाट उडान हुनुपर्ने सोलुखुम्बुका प्रदेश सांसद तथा नेपाल कम्युनिस्ट पार्टी (नेकपा)का प्रमुख सचेतक बुद्धिकुमार राजभण्डारी बताउँछन् । भन्छन्, ‘विमानस्थल भएर पनि सडकबाटै यात्रा गर्नुपर्ने बाध्यता छ । प्रदेश  सरकारले यस विषयमा कार्यक्रम ल्याइसकेकाले काम हुने आशा छ ।’

तराईमा सुनसरी तथा पहाडमा उदयपुर, धनकुटा, तेह्रथुम र पाँचथर विमानस्थल छैनन् । प्रदेश सरकारले ती जिल्लालाई पनि हवाई सेवासँग जोड्ने योजना अगाडि सारेको छ । 

धनकुटाको बेलहारामा विमानस्थल निर्माणका लागि विस्तृत परियोजना प्रतिवेदन (डीपीआर) तयार भइसकेको छ । त्यसका लागि स्थानीय बासिन्दाले ६० रोपनी जग्गा उपलब्ध गराउने भएका छन् ।