एम्बाप्पेको दोहोरो गोलसँगै पीएसजीको जित

काठमाडौं– फ्रेन्च कपको बुधबार राति सम्पन्न खेलमा साविक विजेता पेरिस सेन्ट जर्मेन(पीएसजी) फरवार्ड केलियन एम्बाप्पेले दोहोरो गोल गरेका छन्।

एम्बाप्पेको गोलसँगै लिग वान लिडर लिल्ललाई ३–० गोलले हराउँदै पीएसजी फ्रेन्च कपको क्वार्टरफाइनलमा पुगेको छ।

एम्बाप्पेको गोलअघि माउरो इकार्डीले गोल गर्दै पीएसजीलाई सुरुआति अग्रता दिलाएका थिए। उनले खेलको नवौं मिनेटमै गोल गरे।

खेलको ४१ औं मिनेटमा पेनाल्टीमा पाएको अवसरको सदुपयोग गर्दै एम्बाप्पेले व्यक्तिगत पहिलो गोल गरे। उनले दोस्रो गोल दोस्रो हाफको इन्ज्युरी समयमा गर्दै पीएसजीलाई ३–० गोलको अग्रता दिलाए।

तर खेलको ७८ औं मिनेटमा युसुफ याजिसीले पेनाल्टीको अवसर सदुपयोग गर्न नसकेपछि लिल्लले कुनै गोल गर्न सकेन। उसले पीएसजीको पोस्टमा गरेको तीन प्रहार पनि पीएसजीका किप नभासले सहजै रोकिदिएका थिए।

यससँगै लिल्ल प्रतियोगिताबाट बाहिरिएको छ। फ्रेन्च कपमा राउन्ड अफ १६ का बाँकी खेल अप्रिलमा हुनेछ।