भक्तपुरका दुई टिम देशव्यापी टेनिसकाे फाइनल प्रवेश

काठमाडौं- भक्तपुर नगरपालिकाको दुई टिम स्पिन इभेन्ट्सले आयोजना गरेको देशव्यापी अन्तर वडा टेबलटेनिस प्रतियोगिताको महिलातर्फको फाइनलमा प्रवेश गरेका छन्। 

लैनचौरस्थित राष्ट्रिय टेबलटेनिस प्रशिक्षण केन्द्रमा सोमबार (आज) भएको खेलमा भक्तपुर नगरपालिका-२ ले काठमाडौं महागरपालिका–२ लाई ३-० तथा भक्तपुर नगरपालिका–८ ले ललितपुर महागरपालिका–१२ लाई ३–१ को सेटमा पराजित गर्दै फाइनलमा स्थान सुरक्षित गरे।

प्रतियोगितामा पुरुषमा २६ टिमका ४३३ खेलाडीको सहभागिता छ। महिलामा ८ टिमका ९० खेलाडी सहभागी छन्। पुरुष/महिला सिंगल्स र टिम तथा भेट्रान ४० वर्षमाथि र ४५ वर्षमाथि गरी ६ स्पर्धामा प्रतिस्पर्धा भइरहेको छ।

पुरुष/महिला सिंगल्सका विजेताले ३० हजार, उपविजेताले १५ हजार र तेस्रो हुनेले ७ हजार ५ सय नगद पुरस्कार प्राप्त गर्नेछन्।

शीर्ष १६ वरीयतामा रहेका खेलाडीले सहभागिताको अवसर पाउने छैनन्। भेट्रानमा शीर्ष तीन स्थान हात पार्नेले क्रमशः १० हजार, ५ हजार र २ हजार ५०० नगद पाउने छन्।

टिम च्याम्पियन वडालाई ५० हजार नगदबाट पुरस्कृत गरिने आयोजकले बताएको छ। प्रतियोगिता चैत ७ गतेसम्म चल्ने छ।