सिटीको जितमा अग्युरोले १४ महिनापछि गरे गोल

काठमाडौं – अर्जेन्टिनी फरवार्ड सर्जियो अग्युरोले १४ महिनापछि प्रिमियर लिगमा गोल गरेका छन्। 

शनिबार राति सम्पन्न खेलमा उनले गोल गरेसँगै लिगलिडर म्यानचेस्टर सिटीले फुलहामको मैदानमा घरेलु टिमविरुद्ध ३–० गोलको जित निकालेको हो।

अग्युरोको गोलअघि नै सिटीका लागि जोन स्टोइनिस र ग्याब्रियल जिससले समान १–१ गोल गरेका थिए।

पहिलो हाफ गोलरहित बराबरी भएको खेलको ४७ औं मिनेटमा गोल गर्दै दोस्रो हाफमा स्टोइनिसले सिटीलाई अग्रता दिलाए। क्यानन्सेलोले दिएको पासलाई उनले फुलहामको पोस्टमा छिराएका थिए।

त्यस्तै, खेलको ५६ औं मिनेटमा जिससले गोल गर्दै अग्रतालाई दोब्बर बनाए। यता चोटका कारण लामो समय मैदानबाहिर बसेका सर्जियो अग्युरोले २०२० को जनवरीयता पहिलो गोल गरेका छन्।

अग्युरोको गोलसँगै ३–० गोलको जित निकालेको प्रशिक्षक पेप ग्वार्डिओलाको टिमले १७ अंकको अग्रतासँगै लिग लिड गरिरहेको छ। सिटीको ७१ अंक छ भने दोस्रोस्थानको युनाइटेडको ५४ अंक छ।

पराजित फुलहाम रेलिगेशन जोनको शीर्षस्थानमा छ।