ला लिगामा रियलको जित, बराबरीमा रोकियो एथ्लेटिको

काठमाडौं – स्पेनिस ला लिगाअन्तर्गत शनिबार राति भएको खेलमा डिफेन्डिङ च्याम्पियन रियल मड्रिडले पुनरागमन जित निकालेको छ।

रियलको अल्फ्रेदो डी स्टेफानो रंगशालामा सम्पन्न खेलमा घरेलु टिमले पाहुना टिम एल्चेलाई २–१ गोलले हराएको हो।

पहिलो हाफमा गोलरहित बराबरी भएपछि खेलको ६१ औं मिनेटमा गोल गर्दै एल्चेका डानी क्याल्वोले पाहुना टिमलाई अग्रता दिलाएका थिए।

यससँगै थप प्रतिस्पर्धात्मक बनेको खेलको ७३ औं मिनेटमा करिम बेञ्जेमाले गोल गर्दै रियललाई हारबाट जोगाए।

उनले हारबाट मात्र जोगाएनन् बरु इन्ज्युरी समयमा थप एक गोल गर्दै घरेलु टिमलाई जित दिलाए।

यो जितसँगै २७ खेलबाट रियलले ५७ अंक जोड्दै शीर्षस्थानको एथ्लेटिको मड्रिडभन्दा ६ अंक पछि छ।

शीर्षस्थानको एथ्लेटिकोले गएरातिको खेलमा गेटाफेसँग गोलरहित बराबरी खेल्दै एक अंक थप गरेको थियो।

गोलका अवसरहरुलाई सदुपयोग गर्न नसक्दा एथ्लेटिको र गेटाफे दुवै टिमले जित निकाल्न सकेनन्।