२०१७ यता लगातार ३ खेलमा क्लिन सिट राख्दै चेल्सीको बराबरी

काठमाडौं– इंग्लिस प्रिमियर लिग(ईपीएल) अन्तर्गत आज शनिबार साँझ सम्पन्न खेलमा चेल्सी बराबरीमा रोकिएको छ।

लिड्स युनाइटेडको इल्यान्ड रोड रंगशालामा सम्पन्न खेलमा चेल्सीले घरेलु टिमसँगै गोलरहित बराबरी खेलेको हो। यो बराबरीसँगै शीर्ष चारमा रहेको चेल्सीले थप दुई अंक गुमाएको छ।

उसले खेल अवधिभर १५ प्रहार गरे पनि पोस्ट क्षेत्रमा आठ प्रहार गरेको थियो। त्यसमध्ये कुनै प्रहारको बलले लिड्सको नेट चुम्न सकेन।

यता लिड्सले प्रहार गरेको चार सुट पनि गोलमा परिणत हुन सकेन। यससँगै दुवै टिमले १–१ अंक बाँडे।

यो बराबरीसँगै चेल्सीको प्रशिक्षक थोमस टुचेल १० खेलसम्म अपराजित छन्। उनले हेड कोचको जिम्मेवारी सम्हालेयता हार बेहोरेका छैनन्। माओरिजियो सारीको प्रशिक्षणमा २०१८ यता यो चेल्सीको सबैभन्दा लामो अपराजित यात्रा हो।

सारीको प्रशिक्षणमा रहेको टिम लगातार १२ खेलसम्म अपराजित थियो। अहिले टुचेलले फ्रांक लाम्पार्डको नौ खेलको अपराजित यात्रालाई पछि छोडेका छन्।

त्यस्तै, उसले २०१७ यता लगातार तीन खेलमा क्लिन सिट राखेको छ।