पुलिसले जित्यो मेयर कपको उपाधि

काठमाडौं - विभागीय डर्बी एपीएफलाई हराउँदै नेपाल पुलिस क्लबले काठमाडौं मेयर कप एक दिवसीय क्रिकेटको उपाधि जितेको छ।

कीर्तिपुरस्थित त्रिविको क्रिकेट मैदानमा सम्पन्न खेलमा एपीएफलाई आठ विकेटले हराउँदै पुलिसले उपाधि जितेको हो।

गत वर्षको प्रधानमन्त्री कपको फाइनलमा त्रिभुवन आर्मी क्लबलाई हराएर उपाधि जितेयता पुलिसले अन्य उपाधि जितेको छैन।

भर्खरै सम्पन्न फाइनल खेलमा टस जितेर ब्याटिङ रोजेको एपीएफ पुलिसका बलरसामु २९ ओभर चार बलमा मात्र टिक्दै १०५ रन बनाएको थियो। 

दोस्रो इनिङमा ब्याट सम्हालेको पुलिसले २४ ओभरमा मात्र दुई विकेट गुमाएर लक्ष्य पूरा गरेको हो। 

टस जितेर ब्याटिङ रोजेको एपीएफले कमजोर सुरुआत गर्दै तेस्रो ओभरको पहिलो बलमा तेस्रो विकेटको रूपमा कप्तान सरद भेषावकरलाई गुमाएको थियो।

१० रन बनाएको अवस्थामा कप्तान गुमाएपछि एपीएफका भुवन कार्की र सन्दीप जोराले ३२ रनको साझेदारी गरे।

कार्की १४ रन बनाउँदै पेवेलियन फर्किए भने जोराले १८ रन बनाए। 

त्यस्तै वसन्त रेग्मीले २२ रन र अमर रौटेलाले १८ रनको योगदान दिए।

एपीएफका आशिफ शेख र कप्तान भेषावकरले रन जोड्न सकेनन्। 

कप्तान भेषावकरलाई पेवेलियन पठाएका गुल्सन झाले थप तीन विकेट लिए भने सागर ढकालले पनि समान चार विकेट गिराए।

एक विकेट लिनेमा पवन सर्राफ र ललित राजवंशी रहे। पाँच ओभर बलिङ गरेका राजवंशीले दुईको इकोनोमी प्रदान गरे।

जवाफी ब्याटिङमा आएका पुलिसका ओपनर सुनिल धमला र कुशल भुर्तेलले ३३ रनको साझेदारी गरे।

भुर्तेलले १५ रन बनाए भने समान १५ रन बनाएका अनिल शाहले धमलासँग ३५ रनको साभेदारी गरे।

पुलिसको जितका लागि धमलाले ५९ रनको अर्धशतकीय पारी खेले। उनले ८२ बलमा दुई छक्का र सात चौकासहित सो रन बनाएका थिए।

पराजित एपीएफ यसअघि सम्पन्न प्रधामन्त्री कपको फाइनलमा पनि त्रिभुवन आर्मी क्लबसँग पराजित भएको थियो। तर, मेयर कपको लिग चरणमा तीन जित र एकमात्र हार बेहोर्दै फाइनल पुगेको थियो। 

यता प्रधामन्त्री कपको सेमिफाइनलमै चित्त बुझाएको पुलिसले पनि लिगमा तीन जित र एक हारका साथ फाइनल पुगेको थियो। 

फाइनलमा जित निकाल्दै पुलिसले पाँच लाख रूपैयाँ पाएको छ। उपविजेता एपीएफले तीन लाख पाएको छ।

काठमाडौं मेयर कपको आयोजनाका लागि काठमाडौं महानगरपालिकाले ५० लाख प्रदान गरेको थियो। 

क्यानको प्राविधिक सहयोगमा प्रतियोगिता सम्पन्न भएको हो।