नेपालमा हुने भनिएको विश्वकप छनोटको खेल कुवोतमा सर्‍यो

काठमाडौं- नेपालले खेल्ने फिफा विश्वकप २०२२ र एसियाकप २०२३ को संयुक्त छनोट खेल आगामी मे ३१ देखि जुन १५ सम्म हुने एसियाली फुटबल महासंघ (एएफसी) ले बताएको छ।

एएफसीले आज एक सूचना जारी गर्दै नेपाल सम्मिलित समूह बीको सबै खेल कुवेतमा गर्ने बताएको हो।

विश्वकप छनोटमा नेपालले अझै तीन खेल घरेलु मेदानमा खेल्न बाँकी छ। सुरुमा दशरथ रंगशालामा हुने भनिएको खेल दुई हप्ताअघि मात्र एएफसीले नेपालमा नहुने बताएको एन्फाले जनाएको थियो।

नेपालले अष्ट्रेलिया, चाइनिज ताइपेइ र जोर्डनसँग होम खेल खेल्न बाँकी छ।

नेपाल पाँच खेलमा एकमात्र जित निकाल्दै समूहको चौथो स्थानमा छ। नेपालले चाइनिज ताइपइलाई २–० गोलले हराउनुबाहेक बाँकी खेलमा हार बेहोरेको छ।

त्यस्तै, एएफसीले आज जारी गरेको सूचनाअनुसार समूह एको खेल चीनमा, सीको बहराइनमा, डीको खेल साउदी अरेबिया, ईको कतार, एफको जापान, जीको यूएई र एचको खेल दक्षिण कोरियामा हुनेछ।

फिफा विश्वकप २०२२ मा कतारमा आयोजना हुँदैछ भने एसियाकप २०२३ मा चीनमा हुनेछ।