मेयर कप क्रिकेटमा बागमतीद्वारा आर्मी पराजित 

काठमाडौं- मेयर कप क्रिकेट अन्तर्गत आज (बिहीबार) को दोस्रो खेलमा बागमती प्रदेश विजयी भएको छ।

त्रिवि क्रिकेट मैदान कीर्तिपुरमा केहीबेरअघि सम्पन्न खेलमा बागमतीले त्रिभुवन आर्मीलाई ११ रनले पराजित गरेको हो।

बागमती प्रदेशले दिएको २६७ रनको लक्ष्य लिएर मैदान उत्रिएको आर्मीले ४७.१ ओभरमा आफ्ना सबै विकेट गुमाएर जम्मा २५६ रन जोड्न सक्यो।

उसका लागि विनोद भण्डारीले सतकीय पारी खेलेका थिए। उनले ११४ बलको सामना गर्दै ८ चौका र ७ छक्का प्रहार गर्दै ११९ रन जोडे। लोकेश बमले ४६ रन बनाए भने करण केसी २४ रनमै आउट भए।

आर्मीलाई लक्ष्यमा पुग्न नदिन बागगमतीका अरियो पौडेलले सर्वाधिक ५ विकेट लिए। रामनरेश गिरीले २ तथा नन्दन यादव, सोनु देवकोटा र पारस खड्काले १–१ विकेट लिए।

त्यसअघि बागमती प्रदेशले ४९.४ ओभर खेल्दै २६६ रन जोडेको थियो। उसका लागि पारस खड्काले सर्वाधिक ११९ रनको योगदान दिएका थिए।

पारसले १३३ बलमा ११ चौका र २ छक्का प्रहार गरे। नन्दन यादवले नटआउट ४२ रन बनाए भने इशान पाण्डेले २६ रन जोडे।

आर्मीका लागि सोमपाल कामी एक्लैले ५ विकेट लिएका थिए।  त्यस्तै बिक्रम सोब, जितेन्द्र मुखिया, शाहब आलम र करण केसीले १–१ विकेट लिएका थिए।

मेयर कपको उपाधिका लागि भने सशस्त्र प्रहरीको एपीएफले अर्को विभागीय टोली पुलिससँग प्रतिस्पर्धा गर्ने तय भइसकेको छ।