मेयर कपको फाइनलमा एपीएफ पुलिससँग भिड्ने

काठमाडौं- मेयर कप क्रिकेटमा १७८ रनको सामान्य लक्ष्य पाएको सशस्त्र प्रहरीको एपीएफले फाइनलमा विभागीय डर्बी नेपाल पुलिस क्लबको सामना गर्ने भएको छ।

मुलपानीस्थित क्रिकेट मैदानमा भर्खरै आज (बिहीबार) खेलमा काठमाठौं मेयर्स-११ लाई ७ विकेटले हराउँदै एपीएफले फाइनलमा स्थान पक्का गरेको हो।

टस हारेर ब्याटिङको निम्तो पाएको काठमाडौंले एक ओभर एक बल बाँकी रहँदै अल आउट भएर १७७ रन बनाएपछि एपीएफले मध्यम लक्ष्य पाएकोे थियो। जवाफी ब्याटिङमा ४४ ओभर खेल्दै मात्र तीन विकेटको क्षतिमा एपीएफले लक्ष्य पुरा गर्‍यो।

एपीएफको जितका लागि कप्तान शरद भेषावकर र सन्दीप जोराले अविजित अर्धसतकीय इनिङ खेले। भेषावकरले ६१ रन बनाए भने जोराले ६२ रनको योगदान दिए। शंकर रानाले ३१ तथा भुवन कार्कीले ११ रन जोडे।

काठमाडौंका सन्दीप लामिछाने, अनिल खरेल र अन्जु चुनराले समान १–१ विकेट लिए।

पहिले ब्याटिङमा आएको काठमाडौंका लागि सन्दीप रजालीले ४८ र हरिशंकर शाहले ३६ रन बनाए भने बिक्रम भुसालले २० रन जोडे।

यसबाहेक अन्य खेलाडीले उत्कृष्ट प्रदर्शन गर्न सकेनन्। यता एपीएफका लागि अभिनाष बोहरा र कमल ऐरीले समान ३–३ विकेट लिए। त्यस्तै, बसन्त रेग्मी, सरद भेषावकर र भुवन कार्कीले समान १–१ विकेट गिराए।

आजको जितसँगै एपीएफले तीन खेलमा जित र एक खेलमा हार बेहोर्दे फाइनलमा स्थान बनाएको हो।