काठमाडौं- आउँदो अप्रिल ११ बाट पोल्यान्डको किसी सहरमा आयोजना हुने एआईबीए युवा पुरुष तथा महिला विश्व बक्सिङ च्याम्पियनसिपमा नेपालले सहभागिता जनाउने भएको छ।
अन्तर्राष्ट्रिय बक्सिङ संघले आयोजना गर्ने एआईबीए युथ वर्ल्ड बक्सिङ च्याम्पियनसिपमा भाग लिन लागेको नेपाल बक्सिङ संघले जनाएको छ।
संघल आज एक सूचनामा जारी गर्दै लेखेको छ, ‘प्राविधिक समितिको सुझावअनुसार संघले महिला ४६–४८ केजी तौल र महिला ६० केजी तौल समूहको राष्ट्रव्यापी खुला छनोट प्रतियोगिता गर्ने भएको छ।’
प्रतियोगिता आउँदो चैत ३ गते हुनेछ। छनोटमा २००२ जनवरी बाट २००३ डिसेम्बरभित्र जन्मिएका खेलाडी सहभागी बन्नसक्ने संघले बताएको छ।