पीएम कप महिला भलिबलको उपाधि एपीएफलाई

काठमाडौं– सशस्त्र प्रहरीको विभागीय टिम एपीएफले प्रधानमन्त्री कप महिला भलिबलको उपाधि जितेको छ।

मंगलबार नेपालगञ्ज रंगशालामा सम्पन्न अन्तिम खेलमा उसले डिफेन्डिङ च्याम्पियन नेपाल पुलिस क्लबलाई ३–० को सोझो सेटमा पराजित गर्दै लिग जितेको हो।

उपाधि जितेसँगै एपीएफले पाँच लाख र पुलिसले तीन लाख पुरस्कार जितेको छ। सिंगल राउन्ड रोविन शैलीमा भएको प्रतियोगिताको आज सम्पन्न अन्तिम खेलमा एपीएफले पुलिसलाई २५–२२, २५–२३ र २५–१९ को सेटमा पराजित गरेको थियो।

खेलका तीनै सेट प्रतिस्पर्धात्मक बने पनि पुलिसले कुनै सेट आफ्नो पक्षमा पार्न सकेन।

त्यस्तै, आजै सम्पन्न अर्को खेलमा होङ्गान्जी न्यु डायमन्ड स्पोर्टस् क्लबले लुम्बिनी युनाइटेड क्लबलाई ३–० कै सेटमा पराजित गरेको छ। अन्तिम खेलमा जित निकालेसँगै होङ्गान्जी क्लबले तेस्रो स्थानमा रहँदै लिग सकेको छ।

उसले लुम्बिनीमाथि २५–१६, २५–११ र २५–१३ को जित निकाल्दै पुरस्कारस्वरुप एक लाख रुपैयाँ प्राप्त गरेको छ। 

प्रतियोगितामा पुलिस, आर्मी र एपीएफ गरि तीन विभागीय टोलीसहित होङ्गान्जी न्यु डायमन्ड र लुम्बिनी गरि पाँच टिमको सहभागीगता रहेको थियो। त्यसमा आर्मी चौथो भयो भने लुम्बिनी जितबिहिन रहँदै तालिकाको पुछारमा रह्यो।