बी डिभिजन विजेता सातदोबाटोको पहिलो हार

काठमाडौं- सहिद स्मारक बी डिभिजन लिगको विजेता बन्दै ए डिभिजनमा बढुवा भइसकेको सातदोबाटो युथ क्लबले पहिलो हार बेहोरेको छ।

सातदोबाटोस्थित एन्फा कम्प्लेक्समा सम्पन्न खेलमा सातदोबाटो युथ क्लबले मध्यपुर युथ क्लबसँग २–१ गोलको हार बेहोरेको हो।

मध्यपुरको जितका लागि कैलाश लामिछाने खत्री र सन्नी लामाले समान १–१ गोल गरे। यता सातदोबाटोका लागि माल्डिना आङथुपुले एक गोल फर्काए।

खेलको २६ औं मिनेटमा कैलाशले गोल गरेपछि मध्यपुरले अग्रता बनाएसँगै पहिलो हाफमा ऊ एक गोलले अघि रह्यो। दोस्रो हाफको ५० औं मिनेटमा माल्डिनाले गोल गरेपछि खेल १–१ को बराबरी भएको थियो।

तर, ५८ औं मिनेटमा सन्नीले गोल गरेपछि मध्यपुरले २–१ को अग्रता बनायो। तर त्यसपछि खेलमा कुनै गोल नबनेपछि लिगविजेता सातदोबाटो पराजित भएको हो।

हारका बाबजुद सातदोबाटोले लिगमा १० खेलमा २५ अंक बनाएको छ यता विजेता मध्यपुरले १० खेलबाट १३ अंक जोडेको छ।