सात टिम सम्मिलित एन्फा प्रेसिडेन्ट लिगको तालिका सार्वजनिक

काठमाडौं – अखिल नेपाल फुटबल संघ (एन्फा)ले आगामी चैत २ गतेबाट सुरु हुने एन्फा प्रेसिडेन्ट लिगको तालिका सार्वजनिक गरेको छ।

सात टोली सम्मिलित लिगका सम्पूर्ण २१ खेल नेपालगञ्जमा सञ्चालन हुनेछ।

प्रतियोगितामा सैनिक फुटबल क्लब, मनकामना युवा क्लब, धादिङ समाज, त्रिवेणी क्लब, धम्बोझी स्पोर्ट्स क्लब, लेकाली युवा क्लब, स्टार सिटी युवा क्लब सहभागी हुने भएका छन्। 

कोरोना महामारीका कारण प्रभावित बनेपछि एन्फा प्रेसिडेन्ट लिग एक वर्ष पछि सरेको हो।

लिगको पहिलो खेलमा मनकामनाले स्टार सिटीसँग खेल्ने छ। त्यस्तै चैत १५ गते हुने अन्तिम खेलमा स्टार सिटीले त्रिवेणीसँग खेल्नेछ।

प्रेसिडेन्ट लिगको शीर्ष चारमा रहेका टिमले राष्ट्रिय लिग खेल्ने पाउने छन्। 

गत वर्ष प्रेसिडेन्ट लिग नहुने सम्भावना बढेपछि एन्फाले राष्ट्रिय लिग नयाँ क्यालेन्डरमा राखेको थिएन।

तर, एन्फाले प्रेसिडेन्ट लिग गरेपछि राष्ट्रिय लिग पनि गर्ने भएको हो।

राष्ट्रिय लिगमा ए डिभिजन लिगको शीर्षस्थानमा रहेका ६ टिम र प्रेसिडेन्ट लिगका चार गरी १० टोलीले प्रतिस्पर्धा गर्नेछन्।