टोटेनहमको जितमा खुलेका बेल

काठमडौं – इंग्लिस प्रिमियर लिग(ईपीएल)अन्तर्गत आइतबार राति सम्पन्न खेलमा टोटेनहम हट्स्परको सानदार जितका लागि ग्यारेथ बेल र ह्यारी केनले समान २–२ गोल गरे।

क्रिस्टल प्यालेसविरुद्ध घरेलु मैदानमै ४–१ गोलको जित निकाल्ने क्रममा बेल र केनले सो गोल गरेका हुन्।

यससँगै स्पेनिस क्लब रियल मड्रिडमा खेलका लागि संघर्ष गरिरहेका ग्यारेथ बेल त्यहाँबाट लोनमा इंग्ल्यान्ड पुगेपछि प्रिमियर लिगमा आफ्नो उत्कृष्ट खेल प्रस्तुत गरिरहेका छन्।

चोटका कारण उनले जारी सिजनको सुरुमा कम अवसर पाए पनि पछिल्ला खेलहरूमा उत्कृष्ट पुनरागमन गरे। गएरातिको खेलमा टोटेनहमका लागि सुरुआती दुई गोल नै बेलले गरे।

यससँगै बेलले जारी सिजनको प्रिमियर लिगमा पाँच गोल गरेका छन्। त्यस्तै सबै खेलमा गरी टोटेनहमका तर्फबाट १० गोल र तीन एसिस्ट गरिसकेका छन्।

गएराति टोटेनहमको जितका लागि बेलले २५ औं मिनेटमा पहिलो गोल गरे। तर पहिलो हाफको इन्ज्युरी समयमा क्रिस्टलका क्रिस्टियन बेनेटेकले गोल गरेपछि पहिलो हाफ बराबरीमा रोकिएको थियो।

दोस्रो हाफको ४९ औं मिनेटमा गोल गरेका बेलले पुनः टोटेनहमलाई अग्रता दिलाए।

त्यसपछि खेलको ५२ औं र ७६ औं मिनेटमा केनले गोल गरेपछि टोटेनहमले ४–१ गोलअन्तरले खेल जित्यो।

यो जितसँगै टोटेनहम छैटौं स्थानमा छ। ऊ शीर्ष चारमा रहेको चेल्सीभन्दा दुई अंक मात्र पछि छ। यसकारण ऊ अझैसम्म चौथो स्थानका लागि संघर्ष गरिरहेको छ।

यता पराजित क्रिस्टल प्यालेस १३ औं स्थानमा छ।