बाग्मतीको लगातार दोस्रो हार, काठमाडौं मेयर–११ को सानदार जित

काठमाडौं– काठमाडौं मेयर कपको मुख्य स्पोन्सर काठमाडौं महानगरपालिकाको नाममा सम्मिलित काठमाडौं मेयर–११ टिमले बाग्मती प्रदेशलाई ९४ रनले हराएको छ।

२४५ रनको लक्ष्य पाएको बाग्मती ३४ ओभर तीन बलमै सम्पूर्ण विकेट गुमाएर १५० रनमा समेटिएपछि काठमाडौं मेयर ११ ले सुरुआती जित निकालेको हो।

मूलपानीस्थित क्रिकेट मैदानमा काठमाडौंका कप्तान सन्दीप लामिछानेले ४२ र सौरभ खनालले सर्वाधिक ४९ रन बनाएपछि काठमाडौं मेयर ११ ले बाग्मतीलाई कठिन लक्ष्य प्रस्तुत गरेको थियो।

टस हारेर ब्याटिङको निम्तो पाएको काठमाडौंका सन्दीप रजालीले ३३, सिद्धान्त लोहनीले ३४ र विपिन खत्रीले ३२ रन बनाए। काठमाडौंलाई बाग्मतीका तर्फबाट अतिरिक्त २८ रन प्राप्त भएको थियो।

बलिङतर्फ बाग्मतीका नन्दन यादवले चार विकेट लिए भने रामनरेश गिरी र अरियो पौडेलले समान १–१ विकेट गिराए।

जवाफी ब्याटिङमा आएको बाग्मतीका पृथु बास्कोटाले सर्वाधिक ६० रन बनाए भने इशान पाण्डे र कप्तान ज्ञानेन्द्र मल्लले समान १७–१७ रन जोडे।

त्यस्तै, आदिल खानले १५ र पारख खड्काले १० रन बनाए। बाग्मतीलाई लक्ष्य पूरा गर्न नदिन सन्दीप लामिछानेले तीन विकेट लिए भने विपिन खत्री र अनिल खरेलले समान २–२ विकेट गिराए।

काठमाडौंका कप्तान सन्दीप प्लेयर अफ दि म्याच बने।

मूलपानी मैदानमा हिजो सम्पन्न खेलमा बाग्मतीले ७३ रनको लक्ष्य पूरा गर्न तीन रनले चुकेपछि दुई रनको हार बेहोरेको थियो। यससँगै उसले लगातार दुई हार बेहोरेको छ।

यससँगै बाग्मतीको फाइनल यात्रा कठिन भएको छ। काठमाडौंले पहिलो जित निकाल्दै दुई अंक जोडेको छ।