इलाममा धान भण्डारण गृह निर्माण गरिँदै

इलाम- यहाँस्थित चुलाचुली गाउँपालिकामा धान भण्डारण गृह निर्माण भइरहेको छ। 

किसानलाई धान भण्डारण गर्न सहज बनाउनका लागि कृषि ज्ञान केन्द्रको अगुवाइमा भण्डारण गृह निर्माण थालिएको हो। 

गत पुसको पहिलो साताबाट निर्माण सुरु भएको भण्डारण गृह यही माघसम्ममा सकिने छ। सञ्चालक समिति चुलाचुली र ज्ञान केन्द्रको ५०–५० प्रतिशत खर्चमा बन्ने भवनको कूल लागत १२ लाख ३८ हजार हो। 

चुलाचुली इलामकै बढी धान उत्पादन हुने क्षेत्र हो। किसानलाई सर्वसुलभ मूल्यमा धान बेच्नका लागि भण्डारण गृह आवश्यक परेको हो।

यहाँका किसानले झापा र मोरङमा धान बेच्छन्। ठूलो परिमाणमा एकैपटक बेच्दा बढी मूल्य पर्नाले भण्डारण गृह आवश्यक परेको उपभोक्ता समिति चुलाचुलीका संयोजक त्रिलोचन गौतमले बताउनुभयो। सहकारीमार्फत यहाँका किसानले धान बिक्री गर्छन्। 

भण्डारण गृह निर्माणपछि धान केलाउन र ग्रेडिङ गर्न सहज हुने गौतमले जानकारी दिए। भण्डारण गृह एकतले र तीनकोठे हुनेछ। झापा र मोरङका विभिन्न स्थान लगेर यहाँका किसानले धान बेच्ने गरेका छन्। धानमात्र होइन भण्डारण गृहमार्फत धान पेलेर चामल बेच्ने प्रबन्ध पनि मिलाउँदै गरेको संयोजक गौतमको भनाइ छ।

इलामकै अन्न खानी भनेर चिनिने यो क्षेत्र झापा जिल्लाको सीमावर्ती जिल्ला हो। तराईको फाँट भएकाले पनि यहाँका ९५ प्रतिशत किसानले धानखेती गर्छन्। इलामको तल्लो भेग भएकाले जिल्लास्थित ज्ञान केन्द्रमार्फत पाउने सुविधा नपाउने गरेको यहाँका किसानको गुनासो छ। 

तर पछिल्लो समय केन्द्रकै अगुवाइमा यस्ता काम हुन थालेपछि किसान केही सकारात्मक देखिन थालेका छन्।