ललिता निवास प्रकरणमा भाटभटेनीका सञ्चालक गुरुङसँग २ करोड धरौटी माग

काठमाडौं- बालुवाटारस्थित ललिता निवास जग्गा प्रकरणमा भाटभटेनी सुपर स्टोरका सञ्चालक मीनबहादुर गुरुङसँग विशेष अदालतले २ करोड रूपैयाँ धरौटी माग गरेको छ।

बुधबार बयानका लागि हाजिर भएका गुरुङसँग अदालतले २ करोड रुपैयाँ धरौटी माग्ने आदेश दिएको विशेष अदालतका प्रवक्ता पुष्पराज पाण्डेयले जानकारी दिए।

गुरुङले धरौटी बराबरको रकम बैंक ग्यारेन्टी राखेर रिहा भएका छन्। न्यायाधीशहरु प्रेमराज कार्की र अब्दुल अजिज मुसलमानको संयुक्त इजलासमा भएको थुनछेक बहसपछि गुरुङसँग धरौटी मागिएको हो। 

गुरुङ परिवारका नाममा २०७६ फागुन २३ गते १५ दिने म्याद जारी भएको थियो। अख्तियारले विशेष अदालतमा दायर गरेको आरोपपत्रअनुसार बालुवाटारको सरकारी जग्गाको गैरकानूनी किनबेचमा व्यवसायी गुरुङसँगै उनको छोरा कल्याण गुरुङ, छोरी तथा भाइ र बुहारीसमेतको संलग्नता रहेको पाइएको थियो। 

विशेष अदालतमा बालुवाटार जग्गा प्रकरणमा १७५ जनालाई अख्तियारले अभियोग लगाएर मुद्दा चलाएको थियो। यीमध्ये मुद्दा चलाइएका पूर्व उपप्रधानमन्त्रीसमेत रहेका कांग्रेस नेता बिजयकुमार गच्छदार भने अहिलेसम्म अदालतमा बयानका लागि उपस्थित भएका छैनन्।

तत्कालीन समयमा सचिव रहेका हैसियतले मुद्दा चलाइएका अख्तियारकै पूर्व प्रमुख आयुक्त दीप बस्न्यातलाई भने विशेष अदालतले पूर्पक्षका लागि थुनामा पठाएको थियो। उनले विशेष अदालतको निर्णयविरुद्ध सर्वोच्च अदालतमा पुनरावेदन गरेका छन्।