निर्वाचनका लागि सुरक्षा योजना बनाउन सशस्त्र  प्रहरीलाई गृहमन्त्रीको निर्देशन

काठमाडौं– गृहमन्त्री रामबहादुर थापाले आगामी वैशाखका लागि घोषित मध्यावधि निर्वाचनका लागि आवश्यक सुरक्षा योजना बनाउन सशस्त्र प्रहरी बललाई निर्देशन दिएका छन्।

वरिष्ठ प्रहरी उपरीक्षकबाट नायब महानिरीक्षकमा बढुवा भएका बलका अधिकृतहरुलाई गृह मन्त्रालयमा बधाई तथा शुभकामना दिँदै मन्त्री थापाले निर्वाचनको तयारीमा जुट्न निर्देशन दिएका हुन्।

उनले भने, ‘स्वच्छ, निस्पक्ष र शान्तिपूर्ण ढंगले निर्वाचन सम्पन्न गर्न तपाईंहरू जुट्नुहोस्। त्यसका लागि आवश्यक स्रोतसाधनको कमी भए मन्त्रालयलाई जानकारी गराउनुहोला। कुनै कमी हुन दिइने छैन।’

शान्तिसुरक्षा, सीमा सुरक्षा तथा विपद् व्यवस्थापन लगायतका क्षेत्रमा सशस्त्र प्रहरीले खेल्दै आएको भूमिकाको प्रशंसा गर्दै गृहमन्त्री थापाले गृह मन्त्रालयले तयार गरेको सुधार कार्ययोजना अनुरुप कामकारबाही अघि बढाउन  निर्देशन दिए। उनले भने, ‘फिल्डमा उच्च मनोबलका साथ काम गर्नुहोस्। तपाईंहरुलाई कुनै चुनौती आए गृह मन्त्रालयबाट सहयोग र संरक्षण हुनेछ।’