संसद् विघटन गैरसंवैधानिक नै हो : बार अध्यक्ष श्रेष्ठ 

काठमाडौं– नेपाल बार एसोसिएसनका अध्यक्ष चण्डेश्वर श्रेष्ठले प्रतिनिधिसभा विघटन गैरसंवैधानिक र गैरलोकतान्त्रिक भएको बताएका छन्। 

नेकपाको दाहाल–नेपाल समूहले आज बिहीबार काठमाडौंमा आयोजना गरेको अन्तरक्रियामा उनले भने, ‘अहिले यो मुद्दा अदालतमा गएको छ। लिखित जवाफमा यो राजनीतिक विषय भएकोले अदालत प्रवेश गर्न मिल्दैन भनिएको छ। अहिलेको संविधानमा ससद् विघटन गर्ने व्यवस्था नै छैन। सबै अहिले सचेत भएर लाग्नुपर्ने बेला आएको छ। अहिलेको अवस्थामा देश कहाँ पुग्छ, सबैले सोच्नुपर्ने बेला आएको छ।’

हिजोका दिन बार राजनीतिक परिवर्तनका लागि लडेको स्मरण गर्दै उनले अहिले पनि लड्ने बताए। ‘प्रतिनिधि सभामात्रै होइन, अहिले प्रदेश सभा पनि विघटनका धम्की आइरहेका छन्। अदालतमा हामी कानुनी लडाइँ लडिरहेका छौं। अदालतले कानुनसम्मत् आदेश गर्ला भन्ने त लाग्छ तर सविधानवादको रक्षाका लागि भने सबै लाग्नुपर्छ,’ श्रेष्ठले भने।