काठमाडौं- अमेरिकी निर्वाचनमा ट्रम्पको हार अस्वीकार गर्नेहरुले राजधानी वासिङटन डीसीस्थित संंसद भवन (क्यापिटल बिल्डिङ) मा मच्चाएको हिंसाका क्रममा चार जनाको मृत्यु भएको छ।
अमेरिकी सञ्चारमाध्यमहरुका अनुसार झडपका क्रममा एक महिलासहित चार जना मारिएका हुन्।
‘ट्रम्प अभियान’को ब्यानर बोकेका प्रदर्शनकारीले सुरुमा ह्वाइट हाउस बाहिर प्रदर्शन गरिरहेका थिए। त्यसपछि उनीहरुले क्यापिटल बिल्डिङ बाहिर प्रदर्शन गर्दा प्रहरीसँग झडप भयो । त्यसलगत्तै प्रदर्शनकारीको भीड प्रहरी र क्यापिटलका सुरक्षाकर्मीसँग मुठभेड गर्दै संंसद भवनभित्र प्रवेश गर्यो।
त्यसबेला राष्ट्रपति पदमा जो बाइडेनको विजयलाई औपचारिकता प्रदान गर्न संसद बैठक बसिरहेकोे।
प्रदर्शनकारी सिनेटको च्याम्बरसम्म पुगेपछि संंसद बैठक बीचमै रोकियो र उप–राष्ट्रपति माइक पेन्स र अन्य सांसदलाई त्यहाँबाट सुरक्षित स्थानतर्फ लगियो।
त्यतीबेलासम्म भीडले क्यापिटल बिल्डिङभित्र सभामुख न्यान्सी पेलोसीको च्याम्बरसम्म पुगेर तोडफोड सुरु गरिसकेको थियो।
अमेरिकी पत्रिकाले जारी गरेका भिडियोमा ट्रम्प समर्थकहरु पेलोसीको कक्ष र अन्य कक्षमा प्रवेश गरेर फोटो खिच्दै सामान उठाउँदै गरेको देखिन्छ।
यद्यपि त्यसको केही बेरमै सुरक्षाकर्मीले क्यापिटल बिल्डिङलाई नियन्त्रणमा लिन सफल भएका थिए। त्यसक्रममा प्रहरीले गोली समेत चलाएको र अहिलेसम्म चार जनाको मृत्यु भएको पुष्टि भएको छ।
वासिङटन प्रहरीका अनुसार एक महिलाको प्रहरीको गोलीबाट र अन्य तीन जनाको ‘मेडिकल इमरजेन्सी’ का कारण मृत्यु भएको हो। मिडियामा आएका रिपोर्ट अनुसार प्रहरीले ५२ जना प्रदर्शनकारीलाई नियन्त्रणमा लिएको छ।
ट्रम्पमाथि भीडलाई उक्साएको आरोप
राष्ट्रपति डोनल्ड ट्रम्पमाथि भीडलाई उक्साएको आरोप लागेको छ। उनले बुधबार नै ह्वाइट हाउस बाहिर आफ्ना समर्थकलाई संवोधन गर्दै आफूले कहिल्यै हार स्वीकार नगर्ने बताएका थिए।
निर्वाचनमा धाँधली भएको र आफूले हार स्वीकार नगर्ने उल्लेख भएका ट्रम्पका भिडियो ट्वीटर, फेसबुक र इन्स्टाग्रमले डिलिट गर्नुका साथै ट्रम्पको खातालाई ब्लक गरेका छन्।
संसद फेरि सुरु
सुरक्षाकर्मीले प्रदर्शनकारीलाई संसदभवन बाहिर लखेटेपछि संसद बैठक फेरि सुरु भएको छ। सांंसदहरुले घटनाको निन्दापछि इलेक्टोरल कलेजका मतको गणना फेरि सुरु गरेका छन्।