दार्चुलामा हिमपात, जनजीवन प्रभावित

धनगढी- सुदूरपश्चिम प्रदेशको उच्च पहाडी र हिमाली क्षेत्रमा हिमपात भएको छ। 

दार्चुलाको उच्च पहाडी र हिमाली क्षेत्रमा हिमपात भएको हो। हिजो बिहानदेखि भइरहेको वर्षा र हिमपातका कारण जनजीवन प्रभावित बनेको छ। 

दार्चुलाको व्यास, अपि हिमाल, नौगाड, दुहुँ र मार्मा गाउँपालिकाको उच्च भूभागमा हिमपात भएको छ। व्यास र अपिहिमाल गाउँपालिकाको धेरैजसो भूभाग हिमपातले सेताम्मे भएका छन्। हिमपातका कारण चिसो बढेपछि स्थानीयहरुलाई घर बाहिर निस्कन र दैनिक काम समस्या भएको छ।
 
हिमपातपछि चिसो बढेकाले हिमाली क्षेत्रका विद्यालयमा पढाइ प्रभावित भएको छ। अपिहिमालका स्थानीय योगेन्द्र धामीले भने, ‘हिमपातले दैनिक जनजीवनमा प्रत्यक्ष प्रभाव पारेको छ।’

यो वर्ष हिमाली क्षेत्रमा दोस्रो पटक हिमपात भएको हो। मौसमको प्रतिकुलताका कारण दार्चुला जिल्लाको सञ्चार सेवा समेत अवरुद्ध भएको छ। सौर्य उर्जाबाट सञ्चालित टावरहरुमा शनिबारदेखि घाम नलागेर व्याट्री चार्ज नहुँदा टेलिफोन र इन्टरनेट सेवा बन्द भएको छ।