दाहाल पत्नी सीतालाई थप उपचारका लागि भोलि भारत लगिँदै

काठमाडौं– नेकपा दाहाल–नेपाल समूहका अध्यक्ष पुष्पकमल दाहालकी पत्नी सीतालाई थप उपचारका लागि भोलि भारत लैजाने तयारी भएको छ।

दाहालका प्रेस संयोजक विष्णु सापकोटाले सीतालाई थप उपचारका लागि भारत लैजाने तयारी भइरहेको जानकारी दिए। केही दिनयता अस्वस्थ भएपछि सीतालाई भारत लैजान लागिएको हो।  

स्रोतका अनुसार पत्नीको उपचारका लागि दाहाल पनि भारत जान सक्ने बताइएको छ। ‘अध्यक्षज्यू नगई सीताले उपचारका लागि जान मानिरहनुभएको छैन,’ स्रोतले भन्यो, ‘उहाँले मान्नुभएन भने अध्यक्ष पनि जानुहुनेछ।’

छोरीहरुले उपचारका लागि लैजान खोजे पनि सीताले जान नमानेका कारण अध्यक्ष दाहाल नै उपचारका लागि जान सक्ने देखिएको उनी निकट एक नेताले जानकारी दिए। 

पार्किन्सन जस्तो देखिने रोगबाट पीडित सीतालाई स्वास्थ्यमा थप समस्या देखिएपछि गत बुधबार मेडीसिटी अस्पताल भर्ना गरिएको थियो। यसअघि उनको उपचार अमेरिका, सिंगापुर र भारतमा पनि भएको थियो। सीतालाई भारतकाे मुम्बई लैजान लागिएकाे दाहालकाे सचिवालयले जनाएकाे छ।