विराटनगरको श्रम तथा रोजगार कार्यालयमा तोडफोड

विराटनगर- श्रम तथा रोजगार कार्यालय विराटनगरमा आइतबार दिउँसो तोडफोड भएको छ।

सुनसरीको दुहवी-८ स्थित अरिहन्त मल्टिफाइबर लिमिटेडमा कार्यरत रमेश थापा र सुशील गच्छदारले कार्यालयमा तोडफोड गरेको कार्यालयका प्रमुख वरिष्ठ श्रम अधिकृत प्रेमप्रसाद सञ्जेलले बताए।

जुटमिलमा कार्यरत थापा नेपाल कारखाना श्रमिक संघ प्रदेश १ का अध्यक्ष र गच्छदार सुनसरी अध्यक्ष हुन्। उनीहरुले कार्यालय हाताभित्र प्रवेश गरेर पूर्वतर्फको सीसाको झ्यालमा ढुंगाले हानेर फुटाएका छन्।

वरिष्ठ श्रम अधिकृत सन्जेलले कार्यालयमा तोडफोड गर्नेविरुद्ध जिल्ला प्रशासन कार्यालय र जिल्ला प्रहरी कार्यालयमा गाली बेइज्जती ऐन र सार्वजानिक अपराध ऐन अनुसार कारबाहीको माग गर्दै आइतबार निवेदन दिएका छन्।

सरकारी कार्यालयभित्र हुलहुज्जत र गाली बेइज्जती गरेको भन्दै तत्काल पक्राउ गरी कारबाहीको माग गरिएको छ। 

कार्यालयमा बसेर काम गर्न असुरक्षित भएको भन्दै हतियारसहितका सुरक्षाकर्मीको व्यवस्था मिलाइदिन सञ्जेलले माग गरेका छन्।