कर्णालीमा २ मन्त्रीसहित ३ जना दाहाल-नेपाल समूहमा प्रवेश

सुर्खेत- कर्णाली प्रदेशका सामाजिक विकासमन्त्री दल रावल र उद्योग, पर्यटन, वन तथा वातावरणमन्त्री नन्दसिंह बुढाले ओली समूहको साथ छोडेका छन्। 

पूर्व एमाले हुँदा दुबै जना ओली समूहबाट मन्त्री बनेका हुन्। त्यस्तै जुम्लाका सांसद पदमबहादुर रोकायले पनि ओली समूहको साथ छोडेका छन्।

मन्त्रीद्वय र सांसद रोकायाले काठमाडौँमा पुगेर पुष्पकमल दाहाल र माधवकुमार नेपाल समूहमा प्रवेश गरेको कर्णाली प्रदेशका मुख्यमन्त्री महेन्द्रबहादुर शाहीले पुष्टि गरे।

‘दुईजना मन्त्री र एक जना सांसद हाम्रो समूहमा (दाहाल–नेपाल) आइसक्नु भएको छ’ शाहीले भने, ‘केहीबेरमै पार्टी कार्यालयमा औपचारिक घोषणा हुन्छ।’ दुई जना मन्त्री र एक सांसदले साथ छोडेपछि कर्णालीमा ओली समूह झन कमजोर बनिरहँदा प्रदेश सरकार भने सुरक्षित बनेको छ।

नेकपाका ३३ जना सांसदमध्ये अब ओली समूहमा ११ जना र दाहाल–नेपाल समूहमा २२ जना सांसद पुगेका छन्।