रोय र विलियम्सनले दिलाए आईपीएलमा हैदराबादलाई दोस्रो जित

काठमाडौं- इन्डियन प्रिमियर लिग (आईपीएल) तालिकाको पुछारमा रहेको सनराइजर्स हैदराबादले सोमबार रातिको खेलमा राजस्थान रोयल्सलाई सात विकेटले हराएको छ।

दुबई अन्तरराष्ट्रिय रंगशालामा टस जितेर ब्याटिङ रोजेको राजस्थानले पुरा ओभर खेल्दै २० पाँच विकेटको क्षतिमा १६४ रन बनाएको थियो। १६७ रनको लक्ष्यका साथ मैदान उत्रिएको हैदराबादले ९ बल बाँकी रहँदै तीन विकेटको गुमाएर जित निकालेको हो।

हैदराबादका ओपनर ज्यासन रोयले सर्वाधिक ६० रन बनाए भने कप्तान केन विलियम्सनले ५१ रन बनाए। त्यस्तै, रिद्धिमान साहले पनि १८ रन जोडे। राजस्थानका मुस्तफिजुर सहमान, महिपाल लोमरोर र चेतन सकारियाले समान १–१ विकेट लिए थिए।

त्यसपहिले ब्याटिङमा आएको राजस्थानका सन्जु समसनले ८२ रन र यसस्वी जैसवालले ३६ रन जोड्नुबाहेक अन्य खेलाडीले सम्झालायक प्रदर्शन गरेनन्। हैदराबादका सिद्धाथै कौरले दुई साथै सन्दीप शर्मा, भुवनेश्वर कुमार र राशिद खानले समान १–१ विकेट गिराए।

सोमबार रातिको जितसँगै हैदराबादले १० खेलबाट २ जितसँहित चार अंक बनाएको छ। ऊ तालिकाको पुछारमा कायम छ। ८ अंक भएको राजस्थान छैटौं स्थानमा रहेको छ। शीर्षस्थानको चेन्नई सुपर किंग्स  र दिल्ली क्यापिटलको समान १६–१६ अंक छ।

आईपीएलमा मंगलबार दुई खेल हुँदैछन्। पौने ४ बजे सुरु हुने खेलमा कोलकत्ता नाइटराइडर्सले दिल्ली क्यापिटलको सामना गर्दैछ। मंगलबारको खेलमा जित निकाले दिल्ली प्ले अफमा पुग्नेछ।

त्यस्तै, पौने ८ बजे सुरु हुने खेलमा मुम्बई इन्डियान्सले पञ्जाब किंग्सको सामना गर्नेछ। आईपीएलमा कोलकत्ता, पञ्जाब र मुम्बईको समान ८–८ अंक छ। त्यसैले प्ले अफमा पुग्नका लागि यि तिन टिमबीच निकै पेचिलो प्रतिस्पर्धा सुरु भएको छ।