दाङमा प्रहरीको जुवा अप्रेशन, १५ लाखसहित ६५ जुवाडे पक्राउ

दाङ- दाङमा प्रहरीले १५ लाख नगदसहित ६५ जना पक्राउ गरेको छ । 

चाड पर्व सुरक्षा योजनाअन्तर्गत प्रहरीले चलाएको जुवाअप्रेशनका क्रममा विभिन्न समयमा उनीहरु पक्राउ परेका हुन् । 

जिल्लाका विभिन्न स्थानमा अवैध जुवा तास खेल्ने र खेलाउने गरी ६५ जना व्यक्तिसहित १५ लाख १८ हजार २२० रुपैयाँ बरामद गरेको जिल्ला प्रहरी कार्यालय दाङले जनाएको छ । 

तुलसीपुर उपमहानगरपालिका ६ बाट गत असोज ६ र १९ गते १ लाख १९ हजार ५ रुपैयाँसहित २२ जना पक्राउ गरेको प्रहरीले जनाएको छ। 

त्यस्तै असोज २९ गते तुलसीपुर १ बाट २४ हजार ३५६ रुपैयाँसहित ५ जना, असोज १८ गते बबई गाउँपालिका ३ धनुवासबाट २ लाख ६१ हजार ९९० रुपैयाँसहित ८ जना पक्राउ गरेको र उनीहरूलाई जनही ५ हजार जरिवाना र जनही ६ हजार धरौटीसहित कानुन कारबाही गरिएको जिल्ला प्रहरी कार्यालय दाङका प्रवक्ता एवं डिएसपी सुमित खड्काले जानकारी दिए।

त्यस्तै, असोज १८ गते राप्ती गाउँपालिका ८ सिसहनियाँबाट २ लाख ६० हजार १२५ रुपैयाँसहित ११ जनालाई पक्राउ गरिएको र उनीहरूलाई जनही १५ हजार धरौटीसहित कारबाही गरिएको छ। 

त्यसैगरी असोज २६ गते घोराही १४ बाट ७० हजार ४३५सहित ३ जना पक्राउ परेका र उनीहरूले जनही ९ हजार, कात्तिक २ गते घोराही १५ बाट १ लाख २७ हजार ९९० रुपैयाँसहित ५ जना र उनीहरूलाई जनही १० हजार ५००, कात्तिक १२ गते घोराही १० बाट ६२ हजार ९३५ रुपैयाँसहित ४ जना र उनीहरूलाई जनही ८ हजार, धरौटीसहित कारबाही गरिएको प्रहरीले जनाएको छ।

त्यसैगरी कात्तिक १६ गते घोराही १८ बाट ३ लाख २३ हजार ६० रुपैयाँँसहित ५ जना र यहि मंसीर २ गते घोराही १६ बाट २ लाख ६८ हजार ३१५सहित ७ जनालाई पक्राउ गरीएको जिल्ला प्रहरी कार्यालयले जानकारी दिएको छ।