छठ मनाउन सफाइसम्म गरिएन मोहना नदी, तट सुनसान

धनगढी- कार्तिक शुक्ल पक्षको चौथी तिथिबाट सुरु हुने छठ पर्व मनाउन स्थानीय कैलालीको धनगढीस्थित मोहना नदीतटको सफाइ गर्दै आफ्ना लागि पूजास्थल सुरक्षित बनाउन लाग्थे ।

अघिल्लो वर्षसम्म छठ पर्वको समयमा बेहुलीझैं सिंगारिने मोहना नदी यो वर्ष भने कोरोना कहरका कारण सुनसान छ । त्यहाँ न त सफाइ गरिएको छ न त अन्य वर्षझैं सिंगारिएको छ । 

विश्वव्यापी फैलिएको कोरोना संक्रमणलाई मध्यनजर गर्दै यसवर्ष भिडरहित छठ मनाउने निर्णय गरिएको छठ पूजा व्यवस्थापन समिति धनगढीका संयोजक सन्तोष मन्डलले बताए ।

'एकै ठाउँमा धेरै मानिस जम्मा भएमा कोरोना संक्रमण सर्ने खतरा उच्च हुँदा स्वास्थ्य सुरक्षालाई मध्य नजर गर्दै सामूहिक रुपमा पर्व नमनाउने निर्णय गरेका हौ,' संयोजक मन्डलले भने, ‘शुभकामना आदानप्रदानका लागि सामाजिक सञ्जालको प्रयोग गर्छौ ।’ 

जिल्ला प्रशासन कार्यालय कैलालीले पनि छठ पर्वलाई सामूहिक रुपमा नमनाउन आग्रह गरेको छ ।

‘सामूहिक रुपमा पर्व मनाउँदा कोरोना संक्रमण सर्ने जोखिम हुन्छ,’ कैलालीका प्रमुख जिल्ला अधिकारी यज्ञराज बोहराले भने, ‘यो वर्ष सुरक्षित रहेर पर्व मनाउन आग्रह गरिएको छ ।’ 

अघिल्ला वर्षहरूमा धनगढीको मोहना नदीतटमा ५ हजारभन्दा बढीले सूर्यलाई जल चढाउँदै छठ पर्व मनाउने गर्दै आएको बताइएको छ ।