नेकपा महासचिव पौडेलको प्रस्ताव : सचिवालयका सबै सदस्यले राजीनामा गरौं

काठमाडौं-  नेकपाको आज (बुधबार) बसेको सचिवालय बैठकमा महासचिव विष्णु पौडेलले सचिवालयका सबै सदस्यले सामूहिक राजीनामा दिएर नयाँ पुस्तालाई बाटो खोलिदिन प्रस्ताव गरेका छन्। 

नेकपा सम्बद्ध स्रोतका अनुसार बैठकमा पौडेलले भने, ‘हालको सचिवालय टिमले नेतृत्व गर्न सक्दैनौं, हामी अयोग्य भयौं। अब सबैले सामूहिक  राजीनामा गरेर नयाँ पुस्ताका लागि ठाउँ खाली गरौं।”

उनले १८ गते बस्ने स्थायी कमिटीको बैठकबाट उक्त प्रस्ताव पारित गर्न पनि माग गरेका छन्। 

लामो अन्योलपछि बुधबार नेकपा सचिवालय बैठक वुधबार बसेको हो। बैठकमा प्रधानमन्त्री ओलीले पनि प्रस्ताव पेस गर्ने र त्यसका लागि दस्ताबेज लेख्न १० दिन समय मागेपछि अब बैठक १३ गते पुन: बस्ने भएको छ।

दाहालको प्रस्ताव लाञ्छनायुक्त: ओली 

बुधबारको बैठकको सुरुमा सम्बोधन गरेका ओलीले अर्का अध्यक्ष पुष्पकमल दाहालको राजनीतिक प्रस्ताव लाञ्छना र आरोपले भरिएको भन्दै आफू उक्त प्रस्ताव पढेर यत्तिकै बस्न नसक्ने बताएको स्रोतले जानकारी दियो। 

स्रोतले भन्यो, ‘प्रधानमन्त्रीले प्रचण्डको प्रस्तावमा असाध्यै आधारहिन र गम्भीर कुरा उठाइएको र त्यसको व्यवस्थित र तथ्यपरक जवाफ दिन्छु भन्नु भएको छ। त्यसैकारण १३ गतेसम्मका लागि बैठक सरेको हो ।’ 

पार्टीमा देखा परेको समस्या समाधानका लागि आज नेकपा सचिवालय बैठक बसेको थियो।