बिहारमा नीतीशकुमार बने सातौंपटक मुख्यमन्त्री

नयाँदिल्ली-  भारतको बिहारमा नीतीशकुमारले सोमबार मुख्यमन्त्रीको शपथ लिएका छन्।

मुख्यमन्त्रीमा उनको यो सातौं पटकको शपथ हो। नीतीशकुमारलाई विहारका राज्यपाल फागू चौहानले पद तथा गोपनीयताको शपथ गराएका हुन्।

बीजेपीका तर्फबाट तारकिशोर प्रसाद र रेणुदेवीले पनि मन्त्री पदको शपथ लिएका छन्। शपथ ग्रहण समारोहमा केन्द्रीय गृहमन्त्री अमित शाह र भाजपा अध्यक्ष जेपी नड्डा पनि सहभागी थिए।

महागठबन्धन (राजद, कांग्रेस, वाम दल) ले भने शपथ ग्रहण समारोह बहिष्कार गरेको छ।

नीतीशकुमारले पहिलोपटक २००५ मा मुख्यमन्त्री भएका थिए। तर त्यति बेला उनले धेरै समय सरकार चलाउन पाएका थिएनन्। त्यसपछि उनले भाजपासँग मिलेर सरकारको नेतृत्व गर्दै आएका छन्। 

बिहारमा एनडीएमा नीतीशकुमारको पार्टी जदयू, भाजपा, जितनराम माझीको पार्टी हम र मुकेश साहनीको पार्टी वीआईपी संलग्न छन्। 

१० नोभेम्बरमा सार्वजनिक विधानसभाको चुनावी परिणामअनुसार राष्ट्रिय जनता दलले ७५ सिटमा जितेर सबैभन्दा ठूलो पार्टी बनेको छ। यस्तै भाजपाले ७४ सिटमा जितेको छ भने नीतीशकुमारको पार्टी जदयूले ४३ सिटमा जित हासिल गरेको छ। बीबीसी