ला लिगाः रियल मड्रिडको बराबरी, पुछारको टिमसँग एट्लेटिको पराजित

काठमाडौं– स्पेनिस ला लिगाअन्तर्गत शनिबार रातिको खेलमा रियल मड्रिडले घरेलु मैदान सान्टियागो बर्नाबेउमा पाहुना टिम भिल्लारियसँग गोलरहित बराबरी खेलेको छ।

बराबरीका बाबजुद सात खेलबाट १७ अंक बनाएको रियल मड्रिड शीर्षस्थानमा छ। यता पराजित भिल्लारियल ८ अंकका साथ १०औं स्थानमा छ।

त्यस्तै, ला लिगाको साविक विजेता एट्लेटिको मड्रिड सातौं खेलमा पराजित भएको छ। उसले अलाभेसको घरेलु मैदानमा हार बेहोरेको हो।

एट्लेटिकोविरुद्ध भिक्टर लागुर्डियाले चौथो मिनेटमा गोल गर्दै अलाभेसलाई अग्रता दिलाएका थिए। खेल अवधिभर ७२ प्रतिशत समय बलमा नियन्त्रण बनाए पनि एट्लेटिको गोल गर्न नसकेपछि उसले लिगमा पहिलो हार बेहोरेको हो।

यो हारसँगै उसले सात खेलबाट १४ अंक बनाएको छ। यससँगै ऊ तेस्रो स्थानमा छ। समान १४ अंक भएको सेभिया गोल फरकका आधारमा दोस्रो स्थानमा छ।

यता विजेता अलाभेस भने लिगमा पहिलो जितसँगै तीन अंक जोडेर पुछारबाट दोस्रो स्थानमा छ।