डेढ वर्षपछि विराटनगर आए विजयकुमार गच्छदार, विमानस्थलमा स्वागत गर्ने भीड

विराटनगर– नेपाली काग्रेसका उपसभापति तथा पूर्वमन्त्री विजयकुमार गच्छदारलाई विराटनगर विमानस्थलमा भव्य स्वागत गरिएको छ। ललिता निवासको जग्गा व्यक्तिको नाममा दर्ता गरेको अभियोग लागेपछि गच्छदार विराटनगर आएका थिएनन्। 

करिब १९ महिनापछि बिहीबार दिउँसो विराटनगर विमानस्थलमा ओर्लेका गच्छदारलाई नेपाली कांग्रेसका नेता–कार्यकर्ताहरुले भव्य स्वागत गरेका थिए। गच्छदारलाई विमानस्थलमा स्वागत गर्न प्रतिनिधिसभा सदस्य तथा कांग्रेस नेतृ डिला संग्रौला, प्रदेश १ संसदीय दलका नेता तथा कांग्रेस सुनसरी सभापति राजिव कोइराला, मोरङ सभापति डिगबहादुर लिम्वु लगायतका मोरङ, सुनसरीका नेपाली कांग्रेसका नेता कार्यकर्ता विमानस्थलमा पुगेका थिए। 

विराटनगर विमानस्थलमा ओर्लेलगत्तै सञ्चारकर्मीहरुसँग भेटघाटमा उपसभापति गच्छदारले आफूले कहिले पनि अनियमितता र भ्रष्टाचार नगरेको बताए। उनले प्रतिशोधका आधारमा राजनीतिक जीवन नष्ट गर्न खोजिएको दावी गरे। 

मन्त्रिपरिषद्को निर्णयमाथि अख्तियारले कारवाही गर्न नमिल्ने  र यदि कारवाही नै गर्नुपर्ने भएमा मन्त्रिपरिषद् माथि कारवाही गर्नुपर्ने उनको तर्क छ। नेता गच्छदारले न्यायालयले न्याय दिने विश्वास लिएको बताए। उनले भने,‘ भ्रष्टाचार गरेको वा अनियमितता गरेको दोषी ठहर भएमा जनताको अदालतमा फाँसी झुण्डिन तयार छु।’