नेपाल समूह चरणबाट बाहिरियो (तस्बिरहरु)

काठमाडौं- बलियो टोली हङकङसँग बराबरी खेलेपछि नेपाली महिला फुटबल टोली एएफसी महिला एसियन कप–२०२२ छनोटको समूह चरणबाट बाहिरिएको छ।

उज्वेकिस्तान मंगलबार भएको छनोट दोस्रो खेलमा नेपाल हङकङसँग गोल रहित बराबरी खेल्दै अंक बाँड्दा नेपाली महिला फुटबल टोलीको भारतमा आयोजना हुने एएफसी महिला एसियन कपको यात्रा समाप्त भएको हो। दुई खेलबाट १ अंक जोडेको नेपाल अघिल्लो चरण पुग्‍नका लागि हङकङविरुद्ध जित्‍नैपर्ने दबाब रहेको थियो। तर, नेपालले हङकङसँग बराबरीमा चित्त बुझाउँदा छनोटबाटै बाहिरिएको हो।

निकै प्रतिस्पर्धात्मक बनेको खेलमा नेपालले हङकङलाई दबाब दिएर खेले पनि पाएका केही राम्रा अवसर सदुपयोग गर्न सकेन। 

नेपालले पहिलो पटक हङकङसँग बराबरी खेलेको हो। यस अघिको दुई भेटमा नेपालले नतिजा सुम्पिएको थियो। सन् १९८६ मा भएको पहिलो भेटमा नेपाल हङकङसँग १–० ले पराजित भएको थियो भने १९८९ मा भएको दोस्रो भेटमा ३–० ले पराजित भएको थियो।

छनोटको पहिलो खेलमा नेपालले सुरुवाती अग्रता अन्तिम मिनेटमा कायम राख्न नसक्दा फिलिपिन्ससँग २–१ गोल अन्तरले पराजित भएको थियो। उक्त खेलमा नेपालविरुद्ध फिलिपिन्सले बराबरी र इन्जुरी समयमा दोस्रो गोल गर्दै रोमाञ्चक जित निकालेको थियो। 

नेपालसँग बराबरीमा रोकियो छनोट हुने सम्भावना भने अझै कायमै छ। हङकङले अब अन्तिम खेलमा फिलिपिन्ससँग खेल्नेछ। उक्त खेलमा हङकङले सुखद नतिजा निकाले हङकङको अघिल्लो चरणको यात्रा तय हुनेछ भने पराजित भएको खण्डमा फिलिपिन्स अर्को वर्ष भारतमा हुने एसियन कपमा सहभागि हुने मौका पाउनेछ। एसियन कप जनवरी २० देखि फेब्रुअरी ६ सम्म हुनेछ।