मादी हत्याकाण्डका मुख्य योजनाकार खड्‌गबहादुर कार्की सहित चार पक्राउ

काठमाडौं– संखुवासभाको मादीमा भएको सामूहिक हत्याकाण्डमा मुख्य योजनाकार सहित थप चार जनालाई पक्राउ गरेर प्रहरीले सार्वजनिक गरेको छ। जिल्ला प्रहरी प्रमुख डीएसपी लालध्वज सुवेदीले अनुसन्धानका क्रममा चारै जनालाई पक्राउ गरेर सोमबार सार्वजनिक गरिएको जानकारी दिए। 

४७ वर्षीय खड्गबहादुर कार्की घटनाका मुख्य योजनाकार रहेको अनुसन्धानबाट खुलेको प्रहरीले पत्रकार सम्मेलनमा जानकारी दिएको छ। त्यस्तै २८ वर्षीय हस्तबहादुर कार्की, ४९ वर्षीय रणबहादुर कार्की र १७ वर्षीय नरेश कार्की पक्राउ परेका छन्। 

गत भदौ २१ गते बिहान उम्लिङ खोला गाउँका ५२ वर्षीय तेजबहादुर, उनकी ८४ वर्षीया आमा पार्वती, ५२ वर्षीया श्रीमती कमला, बुहारी ३२ वर्षीया रञ्जना, नाति ११ वर्षीय दीपेन र नातिनी सात वर्षीया गोमाको हत्या भएको थियो। 

सङ्खुवासभा प्रहरीले घटनाको सातौं दिनपछि अभियुक्त लोकबहादुर कार्कीलाई पक्राउ गरी सार्वजनिक गरेको थियो। रञ्जनाको मोबाइल घटना भएको बिहानदेखि नै हराएको थियो। सो मोबाइल लोकबहादुरको घरमा फेला परेको थियो।