फुटबलका पहिलो अन्तर्राष्ट्रिय खेलाडी सुब्बाको निधन

काठमाडौं – नेपालका तर्फबाट पहिलो अन्तर्राष्ट्रिय फुटबल खेलमा सहभागी इन्द्रसिंह सुब्बाको मंगलबार बिहान निधन भएको छ।

८४ वर्षीय सुब्बा मुटुरोगबाट पीडित थिए। उनको उपचारका क्रममा सहिद गंगालाल हृदय केन्द्रमा निधन भएको हो।

सुब्बा सन् १९६२ मा तत्कालीन पूर्वी पकिस्तानमा भएको आगा खाँ गोल्डकप नेपालका तर्फबाट सहभागी बनेका थिए। त्यो नेपालले खेलेको पहिलो अन्तर्राष्ट्रिय प्रतियोगिता हो।

उनले विराटनगर चिनी कारखाना, मोरङ ११ लगायतका टिमबाट फुटबल खेलेका थिए।

अखिल नेपाल फुटबल संघ (एन्फा) का वरिष्ठ उपाध्यक्ष पंकजविक्रम नेम्बाङले सुब्बाको निधनमा श्रद्धाञ्जलि व्यक्त गरेका छन्।

उनले फेसबुकमा लेखेका छन्, ‘नेपाल फुटबल टिम सहभागी प्रथम अन्तर्राष्ट्रिय फुटबल प्रतियोगिता आगा खाँ गोल्ड कप (पाकिस्तान) मा नेपाली टिमका महत्त्वपूर्ण सदस्य इन्द्रसिंह सुब्बाको असामयिक निधनको खबरले स्तब्ध बनायो।’