मोरङ प्रहरीले सुरु गर्‍यो पीडितसँगको भेटघाट कार्यक्रम

विराटनगर- ३५ वर्षअघि भदौ १८ गते भएको खुन डाँका मुद्दामा संलग्न रही फरार रहेका मोरङ कटहरी गाउँपालिका–७ तकियाका ८७ वर्षीय उजारू चौधरी थारू र सोही स्थानका ५० वर्षीय शिवना सरदार वातरलाई गत भदौ ९ गते प्रहरीले पक्राउ गर्‍यो। ३५ वर्षपछि उनीहरूलाई पक्राउ गरी कानुनी कारबाही भएको जानकारी गराउन मोरङ प्रहरी प्रमुखसहितको टोली विराटनगर-३ का ८५ वर्षीय धर्मध्वज थापा क्षेत्रीको घरमै पुग्यो। 

पीडित भेट्न प्रहरी प्रमुखसहितको टोली घरमै आउँदा थापा खुसी पनि भए। उनले लामो समयपछि न्याय पाएको बताए। पीडित थापाले भने, ‘प्रहरीको यो अभियानको प्रशंसासमेत गर्छु।’ 

कानुन बमोजिम उचित न्यायिक अनुभूति गराउने उद्देश्यले मोरङ प्रहरीले पीडितसँगको भेटघाट कार्यक्रम सुरु गरेको जनाएको छ। 'पीडकलाई कानुन बमोजिमको दण्ड दिनु, समाजलाई अपराध र अपराधको भयबाट मुक्त राख्नु र पीडितलाई कानुन बमोजिम उचित न्यायिक अनुभूति गराउनु हाम्रो उद्देश्य हो', मोरङ प्रहरीका प्रमुख एसपी जनार्दन जिसीले बताए।

असोज १ बाट जिल्ला प्रहरी कार्यालय मोरङ र मातहत प्रहरी इकाईसमेतले पीडित पुनः भेटघाट कार्यक्रम सुरु गरेका छन्। 

इलाका प्रहरी कार्यालय रानी, रंगेली, सिजुवा, उर्लाबारी, पथरी, लेटाङ र बेलबारीसमेतले पीडित पुनः भेटघाट कार्यक्रमको सुरूवात गरेको र पीडितहरूले प्रहरी घरमै आएर प्रत्यक्ष भेटघाट गरी कानुनी परामर्श, प्रक्रियाको जानकारी र पीडकलाई कानुनी कारबाही सम्बन्धमा जानकारी गराउँदा पीडितहरूले खुसी व्यक्त गरेको प्रहरी प्रवक्ता डिएसपी दीपक श्रेष्ठले बताए।