दुई जितपछि रियल मड्रिड ला लिगा विजेता बन्ने

एजेन्सी– शुक्रबार राति सम्पन्न अलाभेसविरुद्धको खेलमा जित निकालेसँगै रियललाई ला लिगामा लिगविजेता बन्न अब दुई जित आवश्यक बनेको छ।

स्टेडियो अल्फ्रेदो डि स्टेफानो रगंशालामा सम्पन्न खेलमा रियलले अलाभेसविरुद्ध २–० गोलले जित निकालेसँगै जित विजेता बन्न २ जित आवश्यक रहेको हो।

खेलमा जितका लागि करिम बेञ्जेमा र मार्को एसेन्सियाले गोल गरे। खेलको ११ औं मिनेटमा पेनाल्टीमा पाएको अवसरको सदुपयोग गर्दै बेञ्जेमाले गोल गरेका थिए। त्यही गोलसँगै पहिलो हाफमा रियल एक गोलले अघि रह्यो।

दोस्रो हाफमा एसेन्सियाले गोल गरे। उनले खेलको ५१ औं मिनेटमा गोल गर्दै रियलको अग्रतालाई दोब्बर बनाएका थिए। सो अग्रतासँगै रियलले खेलमा जित निकाल्यो।

जितसँगै ३५ खेलमा ८० अंक बनाएको रियललाई २ जित नै लिगमा विजयी बन्न पर्याप्त छ। दोस्रो स्थानमा बार्सिलोनाको ७६ अंक रहेका कारण उसलाई बाँकी तीन खेलमा २ जित पर्याप्त बनेको हो। तर सो जित निकाल्न नसके बार्सिलोनाले उपाधि खोस्ने सम्भावनालाई पनि नकार्न सकिन्न।

गएराति नै सम्पन्न अन्य खेलमा एथ्लेटिक बिल्वाओले घरेलु मैदानमा सेभियालाई २–१ गेल अन्तरले हराएको छ। त्यस्तै अर्को खेलमा रियल सोसिडाडले आफ्नै मैदानमा गा्रनाडासँग ३–२ गोल अन्तरको पराजय भोगेको छ।

ला लिगामा आजका खेलः

ओसासुना र सेल्टा भिगो, राति पौने ९ बजे
भाल्डाडोलिड र बार्सिलोना, राति सवा ११ बजे
एट्लेटिको मड्रिड र रियल बेटिस, पौने २ बजे।