जापानको रंगशालामा डान्सिङ रोबोट

कोरोना भाइरस (कोभिड-१९) संक्रमण जोखिमका कारण रंगशालमा खेल समर्थकको प्रवेशमा बन्देज लगाइएपछि जापानको एक क्लबले नाच्ने रोबोट बनाएर रंगशालामा राखेको छ। जापानिज बेसबल टिम फुकुओका सफ्टबैंक ह्वकले समर्थकलाई ‘डान्सिङ रोबोट’ले विस्थापित गरेको हो।

निप्पोन प्रोफेसनल बेसबल (एनपीबी)मा हिजो (बुधबार) फुकुओका र रकुटेन इगलको खेल थियो। त्यसको अघिल्लो दिन (मंगलबार) नै क्लबले २० भन्दा धेरै डान्सिङ रोबोटहरु खाली रंगशालाको प्यारापिटमा राखेको थियो। त्यहाँ रोबोटहरुले नाच पनि देखाए।

रंगशालामा सफ्ट बैंकको ह्युमनोइड रोबोट (दुई खुट्टाले हिँड्ने) र पिपरको कुकुरको जस्तो आकृति भएको (चार खुट्टा भएको) रोबोटले नाच देखाएका थिए। ४० हजार दर्शक क्षमताको सो रंगशालामा ह्वकका समर्थकले गर्ने डान्सको कपी रोबोटमा गरिएको सफ्ट बैंकले बताएको छ।

केही रोबोटहरुले ह्वकको क्याप लगाएर नृत्य गरे। यसबारे ह्वकका समर्थकले सामाजिक सञ्जालमा मिश्रित अभिव्यक्ति दिएका छन्। “मलाई लाग्छ- यो डिस्टोपियाको लक्षण हो,” एक ट्वीटर प्रयोगकर्ताले लेखेका छन्। अर्का एक जनाले यसलाई ‘धेरै राम्रो’ बताएका छन्।

कोरोना महामारीका कारण रोकिएको बास्केटबल जापानमा तीन महिनापछि अर्थात् जुन १९ बाट मैदान फर्किएको हो। तर, आउँदो शुक्रबारबाट जापानले पाँच हजारसम्म समर्थकलाई मैदानमा खेल हेर्न अनुमति दिइने बताइएको छ।

एजेन्सी