संघहरुलाई आफ्नै एन्टी-डोपिङ बनाउन निर्देशन

काठमाडौं– नेपाल ओलम्पिक कमिटी (एनओसी)ले आफू मातहतका खेलकुद संघलाई आफ्नै ‘एन्टी-डोपिङ’ नियम बनाउन अनुरोध गरेको छ।

बुधबार ‘भिडियो कन्फरेन्स’को माध्यमबाट पदाधिकारीसँग छलफल गर्दै एन्टी-डोपिङ को नियम बनाउन संघहरुलाई निर्देशन दिएको हो। एनओसीले संघहरुलाई एक हप्ताको समय राखेर एन्टी-डोपिङ नियम बनाएर नेपाल एन्टी-डोपिङमा बुझाउन निर्देशन दिएको छ।

एनओसीका अध्यक्ष जीवनराम श्रेष्ठले एन्टी-डोपिङको नियमलाई सकारात्मक र गम्भीरताका साथ लिनुपर्ने बताए। खेलाडीले निषेधित पदार्थ खाइरहेको भए पनि सतर्क हुनुपर्ने बताए।

२०२१ देखि, नयाँ एन्टी-डोपिङ नियमबिना राष्ट्रिय खेल संघले अन्तर्राष्ट्रिय प्रतिस्पर्धामा भाग लिन नपाउने पनि एनओसीले जनाएको छ।

एनओसीका महासचिव निलेन्द्रराज श्रेष्ठले नयाँ एन्टी-डोपिङ नियम बनाउन कुनै सहयोग आवश्यक भएमा नेपाल ओलम्पिक कमिटी, मेडिकल कमिसन र एनओसी कर्मचारीहरूले सहयोग गर्न समेत बताए।