चीनको सिचुवानमा भूकम्पका कारण दुईको मृत्यु, दर्जनौं घाइते

बेइजिङ– चीनको दक्षिण–पश्चिमी प्रान्त सिचुवानमा बिहीबार बिहान भूकम्प गएको छ। सो क्षेत्रमा गएको  ६ म्याग्नेच्युडको भूकम्पले कम्तिमा दुई जनाको मृत्यु र पाँच दर्जनभन्दा बढि मानिस घाइते भएको प्रारम्भिक रिपोर्टहरुले जनाएका छन्।

चिनियाँ सञ्चारमाध्यमहरूका अनुसार तिब्बतसँग जोडिएको प्रान्त सिचुवानको लोचौमा स्थानीय समयअनुसार बिहीबार बिहान ४:३३ बजे भूकम्प गएको हो।

‘भूकम्पका कारण यति नै क्षति भयो भन्ने यकिन भइसकेको छैन तर जनजीवन त्रासपूरर्ण रहेको र कम्तिमा दुईजनाको मृत्यु भएको छ’, चिनियाँ अखबार पिपुल्स् डेलीले लेखेको छ, ‘ क्षतिग्रस्त स्थान र जोखिममा भएका ठाउँबाट मान्छेहरुलाई सुरक्षित स्थानमा लैजाने क्रममा जारी छ। अहिलेसम्म ६ हजार जनालाई उद्धार गरिएको छ।’

भूकम्पका कारण क्षतिग्रस्त र प्रभावित स्थानहरुमा हज्जारौंको संख्यामा सुरक्षाकर्मी तथा उद्धारकर्ताहरु खटिएका छन्। भूकम्पका कारण मृत्यु हुनेहरुको संख्या अरु बढ्नसक्ने बताइएको छ।