गठबन्धनका निर्णय रहरका हुन्, हामी संविधान अनुसार चल्छौं : मुख्यमन्त्री आचार्य

विराटनगर- प्रदेश १ का मुख्यमन्त्री भीमप्रसाद आचार्यले विपक्षी गठबन्धनका दलहरुले रहरका निर्णय गर्दै हिँडेको बताएका छन्।

प्रदेश प्रमुखको कार्यालयमा मन्त्रीहरुको शपथ ग्रहणपछि पत्रकारहरुसँग कुराकानी गर्दै मुख्यमन्त्री आचार्यले भने,‘उहाँहरु आफ्नो निर्णय गर्दै गर्नुहुन्छ, रहरका निर्णयहरु, हामी संविधान अनुसार चल्छौं।’ 

असोज २२ गते बस्‍ने संसद्‌को अधिवेशनमा आफूले विश्वासको मत लिने उनले बताए । विश्वासको मत पाउने भएरै संसद अधिवेशन आह्वान गरिएको मुख्यमन्त्री आचार्यले बताए। 

उनले भने,‘हामी काम गर्ने सरकार हो, काम गर्ने सरकारलाई सबै सांसदले भोट हाल्नुपर्छ।’ सांसदहरुले विश्वासको मत दिनुहुन्छ भन्‍नेमा म विश्‍वस्त रहेको उनले बताए। 

आगामी मन्त्रिपरिषद् विस्तारमा महिलाको पनि सहभागिता हुने मुख्यमन्त्री आचार्यको भनाई छ। यसैबीच प्रदेश १ प्रदेशसभाका विपक्षी गठबन्धनमा आबद्ध दलहरुको बैठकले मुख्यमन्त्रीले असोज ८ गतेभित्रै विश्वासको मत लिनु पर्ने निष्कर्ष निकालेको छ। 

बैठकले संविधान विपरित सरकार चल्न नहुने भन्दै असोज ८ गतेभित्रै विश्वासको मत लिइसक्नु पर्नेतर्फ सचेत गराउने निर्णय गरेको हो।

 मुख्यमन्त्रीले असोज ८ गतेभित्र विश्वासको मत लिन नचाहे नयाँ सरकार गठन गर्न मार्ग प्रशस्त गर्नुपर्ने विपक्षी गठबन्धनले जनाएको छ । 

विश्वासको मत लिने प्रक्रिया अगाडि नबढाए वा राजीनामा गरी सरकार गठनका लागि मार्ग प्रशस्त नगरे अविश्वासको प्रस्ताव लैजाने निर्णय गरेको बताइएको छ।

९२ सदस्यीय प्रदेशसभामा एमालेका ४१, कांग्रेसका २१, माओवादी केन्द्रका १५, नेकपा एकिकृत समाजवादीका १०, जसपाका ३, संयुक्त लोकतान्त्रिक राष्ट्रिय मञ्‍च र राप्रपाका १–१ सांसद छन्।