आर्सनल, चेल्सी र म्यानचेस्टर सिटी एफए कपको सेमीफाइनलमा

एजेन्सी– इंग्ल्यान्डको पुरानो फुटबल प्रतियोगिता एफए कपमा यो सिजनको क्वार्टरफाइनलका खेल सकिएका छन्। कपको गएराति सम्पन्न अन्तिम तीन खेलबाट जितका साथ आर्सनल, चेल्सी र म्यानचेस्टर सिटी सेमीफाइनलमा प्रवेश गरेका छन्।

वेम्बले रंगशालामा गएराति सम्पन्न पहिलो खेलमा सेफिल्ड युनाइटेडलाई २–१ गोलले हराउँदै आर्सननले जित निकाल्यो। आर्सनलको जितका लागि निकोलस पेपेले पेनाल्टीमा पाएको अवसरको सदुपयोग गर्दै गोल गरे भने खेलको इन्ज्युरी समयमा दानी सेल्वालोसले गोल गरे।

सेफिल्डका डेविड म्याक्गोड्रिकले सान्त्वना गोल गरेका थिए।

सोही रंगशालामा सम्पन्न दोस्रो खेलमा लेस्टर सिटीमाथी चेल्सीले १–० गोलको संघर्षपूर्ण जित निकाल्यो। जितका लागि रोस बार्कलले ६३ औं मिनेटमा निर्णायक गोल गरे।

तेस्रो प्रतिस्पर्धामा म्यानचेस्टर सिटीले न्युकासललाई २–० गोल अन्तरले हराएको छ।

सेमीफाइनल प्रवेशका लागि केभिन डि ब्रुनले पेनाल्टीमा पाएको अवसरको सदुपयोग गर्दै ३७ औं मिनेटमा गोल गरे। दोस्रो गोल रहिम स्टार्लिङले खेलको ६८ औं मिनेटमा गरे।

एफए कप अन्तर्गत शुक्रबार राति सम्पन्न खेलबाट म्यानचेस्टर युनाइटेड कपको सेमीफाइनलमा प्रवेश गरेको थियो। प्रतियोगिताको आउँदो चरणमा म्यानचेस्टर युनाइटेडले चेल्सीसँग जुलाई १८ र आर्सनलले म्यानचेस्टर सिटसँग जुलाई १९ मा प्रतिस्पर्धा गर्ने छन्।