२०२३ को महिला विश्वकप अष्ट्रेलिया र न्युजिल्याण्डमा हुने

एजेन्सी– दक्षिण अमेरिकी राष्ट्र कोलम्बियालाई पछि पार्दै आगामी महिला विश्वकप आयोजना अष्ट्रेलिया र न्युजिल्याण्डमा गर्न विश्व फुटबलको सर्वोच्च निकाय फिफाले स्वीकृति प्रदान गरेको छ।

फिफाले स्वीकृति दिएसँगै सन् २०२३ को फिफा महिला विश्वकप अष्ट्रेलिया र न्युजिल्याण्डले संयुक्त रुपमा आयोजना गर्ने तय भएको छ।

यसअघि ब्राजिल र जापानले पनि प्रतियोगिता आयोजना गर्न बिड हालेका थिए। तर, उनीहरुले नाम फिर्ता लिए ।

फिफाको ३५ भोटमा अष्ट्रेलियाले २२ भोट प्राप्त गर्दा कोलम्बियाले १३ भोट पायो । ब्राजिलले भने कोरोना महामारीको जोखिम धेरै भएपछि विश्वकप नगर्ने फैसला गर्दै आफ्नो नाम फिर्ता लिएको थियो। त्यसपछि ऊ कोलम्बियाको पक्षमा देखिँदै आएको थियो।

अष्ट्रेलिया र न्युजिल्याण्डमा २०२३ को जुलाई–अगष्टमा हुने महिला विश्वकपमा पहिलो पटक ३२ टिमले प्रतिस्पर्धा गर्नेछन्। अहिलेसम्म २४ टिमले विश्वकपमा प्रतिस्पर्धा गर्दै आएका छन् ।