तनाव बढेपछि उत्तर र दक्षिण कोरियाले गरे ब्यालेस्टिक मिसाइल परीक्षण

सिओल- कोरियन पेनिनसुलामा तनाव बढिरहेको समयमा बुधबार दुबै उत्तर र दक्षिण कोरियाले ब्यालेस्टिक मिसाइल परीक्षण गरेका छन्। 

प्योङयाङले कोरियन पेनिनसुलामा पाँच मिनेटको अन्तरमा पहिलो पटक दुई वटा ब्यालेस्टिक मिसाइल पूर्वी तटतर्फ फायर गरेको थियो। पहिलो मिसाइल बुधबार दिउँसो १२:३८ मा पहिलो र दोस्रो १२:४३ मा प्रहार गरेको जापानी कोस्ट गार्डले जनाएका छन्। 

प्योङयाङले फायर गरेको करिब तीन घण्टापछि सिओलले नयाँ 'सबम्यारिन-लन्च ब्यालेस्टिक मिसाइल' (सीएलबीएम) फायर गरेको थियो। दक्षिण कोरियाली रक्षा मन्त्रालयले राष्ट्रपति मुन जाइ-इनको सहभागीतामा उक्त परीक्षण गरिएको जनाइएको छ। 

दक्षिण कोरियाले पछिल्लो समय आफ्नो हतियार क्षमता विस्तार गर्दै अमेरिकी निर्भरतालाई कम गरिरहेकोसमेत बताइएको छ। उत्तर कोरियाले मिसाइल कार्यक्रमलाई तीव्रता दिएसँगै दक्षिण कोरियाले पनि आफ्नो क्षमता विस्तार गर्दै गएको हो। 

गत मेमा दक्षिण कोरियाली राष्ट्रपति मुन र अमेरिकी राष्ट्रपति जो बाइडेनबीच ४० वर्ष लामो द्विपक्षीय सम्झौता अन्त्य गर्ने सहमति भएको थियो। 

उत्तर कोरियाको सरकारी समाचार एजेन्सी केसीएनएले दक्षिणको शत्रुतापूर्ण व्यवहार र अमेरिकी सिद्धान्तहरुलाई काउन्टर दिनका लागि ब्यालेस्टिम मिसाइल परीक्षण गरेको जनाएको छ। 

यस परीक्षणसँगै दक्षिण कोरिया विश्वको सातौं सैन्य शक्ति राष्ट्र बनेको रक्षा मन्त्रालयले जनाएको छ। अन्य मुलुकहरुसँग आणविक हतियारहरु भए पनि दक्षिण कोरियासँग त्यस्तो आणविक हतियार नभएकोसमेत जनाइएको छ।