प्रदेश १ मा तीन सांसदले गरे राज्यमन्त्री बन्न अस्वीकार

विराटनगर– प्रदेश १ का मुख्यमन्त्री भीम आचार्यले बुधबार साँझ मन्त्रिपरिषद् विस्तार गर्ने तयारी गरेका छन्। 

अल्पमतमा परेका मुख्यमन्त्री आचार्यले मन्त्रिपरिषद् विस्तारको तयारी गर्दा एमालेका तीन सांसदले मन्त्री बन्न अस्वीकार गरेका छन्।

एमाले प्रमुख सचेतक बुद्धिकुमार राजभण्डारी, सांसद विमल कार्की र निवर्तमान राज्यमन्त्री राजकुमार ओझाले मन्त्री पद अस्वीकार गरेका हुन्। उनीहरु तीनै जनालाई मुख्यमन्त्री आचार्यले राज्यमन्त्रीको प्रस्ताव गरेका थिए। श्रोतका अनुसार राज्यमन्त्रीको प्रस्ताव गरेकाले उनीहरुले अस्वीकार गरेका हुन्। 

पूर्व राज्यमन्त्री ओझाले ३ हप्ते सरकारको राज्यमन्त्री बन्न अस्वीकार गरेको बताएका छन्। मुख्यमन्त्री आचार्यले बुधबार साँझ २ मन्त्री र ३ राज्यमन्त्रीलाई सपथ गराउने तयारी गरेका छन्। 

यसैबीच मन्त्रिपरिषदको बुधबार बसेको बैठकले असोज २२ गते प्रदेशसभाको अधिवेशन बोलाउने निर्णय गरेको छ। सो बैठकको सुरुवातमै मुख्यमन्त्रीले विश्वासको मत लिनुपर्नेछ।