आर्सनलको लगातार दोस्रो हार

एजेन्सी– इंग्लिस प्रिमियर लिग(ईपीएल)मा आर्सनलले लगातार दोस्रो हार बेहोरेको छ।

कोरोनाको महामारीपछि मैदान फर्किएपछिको पहिलो खेलमा म्यान्चेस्टर सिटीसँग हारेको आर्सनल गएरातिको खेलमा ब्राइटोनसँग २–१ गोलले पराजित भएको हो।

ब्राइटोनको जितका लागि लेविर डंक र नेय मौपयले गोल गरे। पहिलो हाफमा दुवै क्लबले गोल गर्न नसकेपछि गोलरहित बाराबरीमा रोकिएको थियो। सबै गोल दोस्रो हाफमा सम्भव भएको थियो।

निकोलल पेपेले ६८औं मिनेटमा गोल गर्दै आर्सनलले सुरुवाती अग्रता बनाएको थियो। तर सो अग्रता जोगाउन सकेन। खेलको ७५ औं मिनेटमा डंक र इन्ज्युरी समयमा मौपयले गोल गरे।

जितसँगै ब्राइटोन ३२ अंकका साथ १५ औं स्थानमा छ भने आर्सनल ४० अंकका साथ दशौं स्थानमा कायम छ।

गएराति नै भएको अर्को खेलमा वुल्भ्सले वेस्ट हामलाई उसकै मैदानमा २–०को गोल अन्तरले हराएको छ। वुल्भ्सका लागि राउल जेमिनिच र पेद्रो नेतोले गोल गरे।

त्यस्तै बर्नेमाउथ आफ्नै मैदानमा क्रिस्टल प्यालेससँग २–० गोल अन्तरले पराजित भएको छ।

ईपीएलमा आजका खेलः
न्युकास्टल र सेफिल्ड युनाइटेड, पौने ९ बजे
एस्टोन भिल्ला र चेल्सी, राति ९ बजे
एभर्टोन र लिभरपुल, राति पौने १२ बजे