पत्रकार बिन्दु चौहानको निधन

बुटवल- रुपन्देहीका पत्रकार बिन्दु चौहानको मृत्यु भएको छ। गए राति साढे १२ बजे उपचारका क्रममा भैरहवास्थित युनिभर्सल कलेज अफ मेडिकल साइन्स (युसिएमएस)मा निधन भएको हो।

पत्रकार महासंघ रुपन्देहीका अध्यक्ष रामराज पोख्रेलले चौहानको मृत्यु बारे जानकारी दिएका छन्। लुम्बिनी क्षेत्रमा रहेर पत्रकारिता गरिरहेका चौहान तीन दिनअघि निमोनिया देखिएपछि लुम्बिनी प्रादेशिक अस्पतालमा भर्ना भएका थिए। 

अवस्था गम्भीर भएसँगै युसिएमएसमा रिफर गरिए पनि उनको उपचारकै क्रममा निधन भएको पोख्रेलले बताए।

चौहान नेपाल पत्रकार महासंघ लुम्बिनी प्रदेश समितिका सदस्य तथा  रुपन्देही शाखाका पूर्व कार्यसमिति सदस्यसमेत हुन्। ४५ वर्षीय चौहानका श्रीमती, ४ छोरा र ३ छोरी रहेका छन्। 

उनको अन्तिम संस्कार स्थानीय कोठी नदीमा गरिने परिवारजनले जनाएको छ। नेपाल पत्रकार महासंघ रुपन्देहीले चौहानको निधनप्रति दुःख व्यक्त गरेको छ।