भारतबाट फर्कंदै गरेका युवकको सीमामा मृत्यु

भैरहवा- लकडाउनका बेला भारतको मुम्बईदेखि विभिन्न दुःख सहँदै सीमावर्ती सहर आइपुगेका एक नेपालीको मृत्यु भएको छ।

मृत्यु हुनेमा पश्चिम नवलपरासी कुडिया ७ का ३५ वर्षीय पुरुष छन्। मुम्बईमा मजदुरी गर्ने उनी कम्पनी बन्द भएपछि घर फर्किएका थिए। उनी तीन दिनको बसयात्रापछि सुनौली आइपुगेको बताइएको छ।

उनको मृत्युको कारण भने खुल्न सकेको छैन। मृतकको कोरोना परीक्षण भारतमै गर्न लागिएको रुपन्देहीका प्रमुख जिल्ला अधिकारी माहादेव पन्थले जानकारी दिए।

स्वाब परीक्षणका लागि भारतीय पक्षले नमुना संकलन गरी प्रयोगशाला लगिसकेको र रिपोर्ट आइसकेपछि शव ल्याएर व्यवस्थापन गरिने प्रमुख जिल्ला अधिकारी पन्थले बताए।

तीन दिनअघि भारतको मुम्बईबाट पाल्पाका तीनजना साथीसहित हिँडेका बिहान ४ बजेतिर सुनौली आइपुगेका थिए। सुनौली बजारमा बसेका उनलाई बिहान वान्ता भएको र पछि मृत्यु भएको इलाका प्रहरी कार्यालय बेलहियाका प्रहरी निरीक्षक ईश्वरी अधिकारीले बताए।