भारतमा कोरोनाबाट एकै दिनमा १२ हजारभन्दा बढी संक्रमित, ३८८ को मृत्यु

काठमाडौं- तिब्र गतिमा फैलिएको कोरोना भाइरसबाट भारतमा बुधबार एकैदिनमा १२ हजार ३ सय ७५ जना संक्रमित भएका छन् । पछिल्लो २४ घण्टामा कोरोनाबाट ३ सय ८८ जनाले ज्यान गुमाएका छन् ।

भारतमा एकै दिनमा यति धेरै व्यक्ति संक्रमित भएको यो पहिलो पटक हो । यसअघि जेठ २५ गते १० हजार ८ सय ६४ व्यक्ति संक्रमित भएका थिए । उक्त रेकर्ड तोड्दै यति धेरै व्यक्ति संक्रमित भएका हुन् ।

लकडाउन खुकुलो बनाएसँगै भारतमा संक्रमण तिब्र गतिमा फैलिएको छ । बजार, पसल, उद्योगधन्दा र यातायातका साधन चल्न थालेपछि दिनहुँ ८ देखि १० हजार व्यक्तिमा संक्रमण पुष्टि हुँदै आएको छ ।

अहिलेसम्म २ लाख ८६ हजार ८ सय ७४ जना संक्रमित भएका छन् भने ८ हजार १ सय ७ जनाको मृत्यु भएको छ । १ लाख ४० हजार ९ सय ७९ जना निको भएर घर फर्किएका छन् ।

भारतमा सबैभन्दा बढि कोरोनाबाट महाराष्ट्र राज्य प्रभावित भएको छ । जहाँ ९४ हजार ४१ जना संक्रमित भएका छन् भने ३ हजार ४ सय ३८ जनाको मृत्यु भएको छ ।

दोस्रो प्रभावित तमिलनाडुमा ३६ हजार ८ सय ४१ जना संक्रमित भएका छन् भने ३ सय २७ जनाको मृत्यु भएको छ ।

दिल्लीमा २२ हजार ८ सय १० जनामा संक्रमण पुष्टि हुँदा ९ सय ८४ जनाको मृत्यु भएको छ । गुजरातमा २१ हजार ५ सय ५४ जना संक्रमित हुँदा १ हजार ३ सय ४७ जनाको मृत्यु भएको छ ।